თბილისის მერმა გიგი უგულავამ დიდ დიღომში მდებარე ამხანაგობა ,,მირაჟის" მიერ აშენებული მრავალბინიანი საცხოვრებელი სახლი დაათვალიერა და მოსახლეობას მერიის გადაწყვეტილება პირადად გააცნო.
თბილისის მერის ინფორმაცით, ქალაქში შეჩერებული მშენებლობის დასრულებისა და სამშენებლო ბიზნესის ხელის შეწყობის მიზნით, 2013 წლის ივლისში თბილისის მერიის ინიციატივით, მიიღეს კანონი ექსპლუატაციაში მიღების დროებითი წესის შემოღებასთან დაკავშირებით.
"აღნიშნულის საფუძველზე უკვე დასრულებული ან დასრულების ეტაპზე მყოფი მშენებლობების დამკვეთებს შესაძლებლობა მიეცათ, გამარტივებული პროცედურებით, ჯარიმის გადახდის გარეშე, ობიექტების ექსპლუატაციაში მიღება მოახდინონ. გამარტივებული წესით მოსარგებლე პირებს ექსპლუატაციაში მიღების ვადებისა და სანებართვო პირობების დარღვევის გამო, საჯარიმო სანქციების გადახდა აღარ უწევთ. ექსპლუატაციაში მიღების გამარტივებული წესი 2014 წლის 16 იანვრამდე მოქმედებს", _ აცხადებენ მერიაში.
მათივე ინფორმაციით, კანონის ცვლილების ძალაში შესვლის დღიდან დროებითი წესით უკვე დედაქალაქის ტერიტორიაზე არსებული 469 შენობის მესაკუთრემ ისარგებლა. მათგან 300-ზე მეტს შესაბამისი გადაწყვეტილება უკვე გადაეცა. მათ შორის არის დიდ დიღომში მდებარე ამხანაგობა ,,მირაჟის" მიერ აშენებული მრავალბინიანი საცხოვრებელი სახლი, რომელის მესაკუთრემ განცხადებით მიმართა თბილისის მერიას. შენობა ექსპლუატაციაში მიიღეს და მოსახლეობამ საკუთარი ფართის საჯარო რეესტრში დარეგისტრირება შეძლო.
