დღეს, 31 აგვისტოს, რაჭაში დაგეგმილ ღვინის ფესტივალზე ახალი ყველის - „რაჭული ტრადიცია" - პრეზენტაცია გაიმართება. როგორც „ქეა საერთაშორისო კავკასიაში" განმარტავენ, „რაჭული ტრადიცია" მალე საქართველოს ყველის ბაზარზე გამოჩნდება და მისი დაგემოვნების შესაძლებლობა ყველა მსურველს შეეძლება.
„ქეა საერთაშორისო კავკასიაში" ინფორმაციით, ყველი „რაჭული ტრადიცია" შეიქმნა რაჭის მაღალმთიან სოფელ შქმერში. თანამედროვე დანადგარებით აღჭურვილი ყველის საწარმო საშუალებას იძლევა, დაასაქმოს ხალხი და ხელი შეუწყოს 30-40 ადგილობრივ ფერმერს რძის რეალიზაციაში. ყოველივე ეს კი გააუმჯობესებს სოფელ შქმერის მოსახლეობის ეკონომიკურ მდგომარეობას.
შეგახსენებთ, რომ პროექტს "სოფლის განვითარება რაჭა-ლეჩხუმში" ახორციელებს „ქეა საერთაშორისო კავკასიაში" (CARE) ადგილობრივ არასამთავრობო ორგანიზაცია „აფხაზინტერკონტთან" თანამშრომლობით. პროექტი დაფინანსებულია შვეიცარიის განვითარებისა და თანამშრომლობის სააგენტოს მიერ (SDC) და მისი მიზანია მეცხოველეობის სფეროში ფერმერთათვის შემოსავლის მდგრადი ზრდის ხელშეწყობა. აგრეთვე, რძისა და ხორცის წარმოების სტიმულირება.
