"ჩვენი ქვეყანა რელიგიურ თავისუფლებას მხარს უჭერს. ვრცელ კომენტარს ამ თემაზე ვერ გავაკეთებ, რადგან ადგილზე არ ვიმყოფებოდი, თუმცა კიდევ ერთხელ გეტყვით, რომ სხვადასხვა აღმსარებლობის ჯგუფების უფლებების დაცვა დემოკრატიულ სახელმწიფოში ერთ-ერთი მთავარი ღირებულებაა", - განაცხადა ალექსანდრა ჰოლ ჰოლიმ.

ცნობისთვის, ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟი 26 აგვისტოს მოხდა. აღნიშნული გადაწყვეტილება ფინანსთა სამინისტროს შემოსავლების სამსახურმა მინარეთის რკინის კონსტრუქციის იმპორტირებისას საბაჟო პროცედურების დარღვევით ახსნა. მინარეთის დემონტაჟს საქართველოში მცხოვრები მუსლიმი მოსახლეობის პროტესტი მოჰყვა და აჭარის მეჩეთთან სხვადასხვა რეგიონიდან ჩასულმა ათასობით მუსლიმმა საპროტესტო აქცია გამართა. საბოლოოდ, აჭარის ავტონომიური რესპუბლიკის მთავრობის თავმჯდომარის არჩილ ხაბაძის შუამდგომლობით, ჭელაში მინარეთის დაბრუნება დღეს საღამოს 19:00 საათისთვის გადაწყდა. აღნიშნული გადაწყვეტილები გასაპროტესტებლად ადგილობრივმა მართლმადიდებელმა მოსახლეობამ ახალციხიდან ჭელასკენ მიმავალი ცენტრალური მაგისტრალი გადაკეტა. მათი თქმით, ისინი მინარეთის აღდგენას არ დაუშვებენ. აღნიშნულ საპროტესტო აქციაში სასულიერო პირებიც მონაწილეობენ და მომიტინგეთა მოთხოვნებს სრულად იზიარებენ.

აღნიშნულ საკითხზე საპატრიარქოში გამართულ შეხვედრაზე ადიგენის რაიონის სოფელ ჭელაში მდებარე მუსლიმთა სამლოცველოს მინარეთის კონსტრუქციის საკანონმდებლო ბაზის მოწესრიგებამდე დალუქვის და დასაწყობების გადაწყვეტილება იქნა მიღებული.

შეხვედრას სრულიად საქართველოს კათოლიკოს პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი ილია მეორე, სხვა მართლმადიდებელი სასულიერო პირები და მუსლიმი საზოგადოების წარმომადგენელი მუფტები ესწრებოდნენ. ამასთან, საქართველოს საპატრიარქო აბსოლუტურად ეთანხმება ადიგენის რაიონის სოფელ ჭელაში განვითარებულ მოვლენებზე მართლმადიდებელი მრევლის სამართლიან პროტესტს.