სრულიად საქართველოს კათოლიკოს პატრიარქსი, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია მეორეს ქორეპისკოპოსების, ტაო-კლარჯეთის და ლაზეთის მიტროპოლიტის თეოდორე ჭუაძის და ბოდბის ეპარქიის ეპისკოპოსის მეუფე იაკობის მოწოდების მიუხედავად ახალციხის ცენტრალურ მაგისტრალზე შეკრებილი მომიტინგეები დაშლას და გზის სავალი ნაწილის გახსნას არ აპირებენ.
პატრიარქის ქორეპისკოპოსები მომიტინგეებთან თბილისიდან რამდენიმე წუთის წინ ჩავიდნენ და სოფელ ჭელაში მინარეთის დაბრუნების საკითხზე მუსულმანური ეკლესიის მუფტებთან საპატრიარქოში დღეს გამართულ შეხვედრაზე ერთობლივად მიღებული გადაწყვეტილების დეტალები გააცნეს, რასაც ადგილზე შეკრებილი მართლმადიდებელი ეკლესიის მრევლის უკმაყოფილება და ხმამაღალი შეძახილები მოჰყვა.
"ჩვენ მივიღეთ გადაწყვეტილება, რომ მინარეთი აღარ გამონტაჟდება. მაგრამ რა თქმა უნდა, კანონიერება არის კანონი. კანონით ის უნდა დაბრუნდეს სოფელში და დასაწყობდეს სოფელში სანამ არ მოხდება შეთანხმება საპატრიარქოსა და მუსულმანების საბჭოს შორის და არ მოხდება ეს კანონის გზით,"- განუცხადა მომიტინგეებს ტაო-კლარჯეთის და ლაზეთის მიტროპოლიტმა თეოდორე ჭუაძემ.
პატრიარქის ქორეპისკოპოსების საპასუხოდ აქციაზე შეკრებილი ადგილობრივი მართლმადიდებელი მოსახლეობის ნაწილმა განაცხადა, რომ ისინი ადიგენის რაიონის სოფელ ჭელაში არსებული მუსლიმთა სამლოცველოს მინარეთის სოფელში დაბრუნებას და დასაწყობებას არ დაუშვებენ და აღნიშნული კონსტრუქციის ახალციხის ფინანსური პოლიციის ტერმინალში გადატანას ითხოვენ.
"მინარეთების დადგმა და მის გარშემო 70 კილომეტრზე მოლას ყვირილი არავის არ აწყობს, საქართველო მართლმადიდებლური ქვეყანაა. დღეს თუ მინარეთს დაგვიდგამენ, ხვალ მამულს მოგვთხოვენ. მოვითხოვთ ქართველობის, სულიერების დაცვას. გვჩაგრავენ, ეს ჩვენს ქართველობაზე და სულიერებაზე ფეხის დადგმაა,"- აცხადებენ ახალციხის ცენტრალურ მაგისტრალზე შეკრებილი მომიტინგეები.
ცნობისთვის, საპატრიარქოში დღეს გამართულ შეხვედრაზე ადიგენის რაიონის სოფელ ჭელაში მდებარე მუსლიმთა სამლოცველოს მინარეთის საკანონმდებლო ბაზის მოწესრიგებამდე დალუქვის და დასაწყობების გადაწყვეტილება იქნა მიღებული.
ამასთანავე, საქართველოს საპატრიარქო აბსოლუტურად ეთანხმება ადიგენის რაიონის სოფელ ჭელაში განვითარებულ მოვლენებზე მართლმადიდებელი მრევლის სამართლიან პროტესტს. ამის შესახებ საგანგებო განცხადება საპატრიარქოში მუსლიმი და მართლმადიდებელი სასულიერო პირების შეხვედრის დასრულების შემდეგ ერთობლივ პრესკონფერენციაზე გაკეთდა.
აღნიშნულ შეხვედრას სრულიად საქართველოს კათოლიკოს პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი ილია მეორე, სხვა მართლმადიდებელი სასულიერო პირები და მუსლიმი საზოგადოების წარმომადგენელი მუფტები ესწრებოდნენ.
"დღეს საქართველოს საპატრიარქოში შედგა კათოლიკოს პატრიარქისა და მღვდელმთავრების შეხვედრა საქართველოს მუსლიმ რელიგიურ ლიდერებთან ადიგენის რაიონში განვითარებული მოვლენების გამო. საქართველოს საპატრიარქო აბსოლუტურად ეთანხმება სამართლიან პროტესტს მომხდართან დაკავშირებით. ამასთან, ვითვალისწინებთ რა მუსლიმი მოსახლეობის განწყობასაც, მუსლიმთა სამმართველოსთან შეთანხმებით ვაცხადებთ შემდგეს: პირველი - მინარეტი დასაწყობდეს სოფელ ჭელაში ნეიტრალურ ადგილზე, დაილუქოს და იყოს დაცული სახელმწიფოს მიერ. მეორე - არ მოხდეს მისი სადმე აღმართვა ვიდრე არ მოწესრიგდება საკანონმდებლო ბაზა და არ შედგება მოლაპარაკება საპატრიარქოსა და მუსლიმთა სამმართველოს შორის. მესამე - ეთხოვოს ხელისუფლებას დაიწყონ მუშაობა, რათა კანონით განისაზღვროს რელიგიური ნაგებობების მშენებლობის მიზანშეწონილობის და ნებართვის გაცემის საკითხი, რათა თავიდან იქნეს აცილებული რელიგიურ ნიადაგზე შფოთი და დაპირისპირება. ამასთან, მივმართავთ როგორც ქრისტიან, ასევე მუსლიმ მრევლს თავი შეიკავონ გამოსვლებისაგან, შეინარჩუნონ სიმშვიდე და ურთიერთპატივისცემა,"- განაცხადა საპატრიარქოს პრეს-სამსახურის წარმომადგენელმა.