ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟის ფაქტს დღეს 19:00 საათზე საქართველოს მთავრობის კანცელარიასთან გააპროტესტებენ.
აღნიშნულ საპროტესტო აქციასთან დაკავშირებით სპეციალური საინიციატივო ჯგუფიც შეიქმნა, რომლის განცხადებასაც "ჯი-ეიჩ-ენი" უცვლელად გთავაზობთ:
„26 აგვისტოს სოფელ ჭელაში მეჩეთთან არსებული მინარეთის დემონტაჟი განხორციელდა, რასაც ეწინააღმდეგებოდა ადგილობრივი მოსახლეობა. პოლიციამ სცემა და დააკავა სოფელ ჭელას მაცხოვრებლები, რომლებიც ცდილობდნენ წინააღმდეგობა გაეწიათ მინარეთის დემონტაჟისათვის. საქართველოს მოქალაქეები აღშფოთებას გამოვთქვამთ მომხდარი ფაქტის გამო და მოვითხოვთ დაიწყოს გამოძიება შსს სპეცრაზმის მიერ გადამეტებული ძალის გამოყენებაზე. ასევე მივმართავთ ცენტრალურ ხელისუფლებას მოთხოვნით, გამოარკვიოს მინარეთის დაშლის ბრძანების მართებულობა. აქამდე გაკეთებული განცხადება იმის თაობაზე, რომ მინარეთის მშენებლობა საბაჟო წესების დარღვევით შემოტანილი სამშენებლო მასალით მიმდიბარეობდა არის აბსურდული. ჩვენ მიგვაჩნია, რომ ისეთი მნიშვნელოვანი საკითხის გადაწყვეტა, როგრიცაა მინარეთის დემონტაჟი, ადგილობრივმა ხელისუფლებამ უნდა შეათანხმოს მოსახლეობასთან და უნდა გაითვალსიწინოს ადგილობრივი მუსლიმი მოსახლეობის საჭიროება მათი აღმსარებლობის თავისუფლების კონსტიტუციური გარანტიების გათვალსიწინებით. მოვითხოვთ, დაუყოვნებლივ რეაგირებას ხელისუფლების მხრიდან, რათა უზრუნველყოფილი იყოს ჭელაში მცხოვრები მოსახლეობის უფლებების ეფექტური დაცვა",- განთქვამია განცხადებაში.
შეგახსენებთ, რომ სოფელ ჭელას მინარეთის დემონტაჟის გადაწყვეტილება ადიგენის მუნიციპალიტეტის საკრებულომ 20 აგვისტოს მიიღო. გუშინ კი, ჭელაში მინარეთის დემონტაჟი განხორციელდა. რამდენიმე საათის განმავლობაში გადაკეტილი იყო სოფლისკენ მიმავალი გზა. მოძრაობა მას შემდეგ აღდგა, რაც სოფლიდან მინარეთი გამოიტანეს.
ჭელაში მუსლიმთა სამლოცველოს მინარეთის დემონტაჟის გამო მეორე დღეა ადგილზე ვითარება დაძაბულია. მინარეთის დემონტაჟის პროცესში სამართალდამცველებისთვის გაწეული წინააღმდეგობის და მათთვის სამსახურებრივი უფლებამოსილების შესრულებაში ხელის შეშლის ბრალდებით ათობით ადილობრივი მუსლიმი დააკავეს.
დაკავებულების გათავისუფლების მოთხოვნით უკვე მეორე დღეა ახალციხის პოლიციის განყოფილებასთან საპროტესტო აქცია მიმდინარეობს. მომიტინგეთა თქმით, მანამ არ დაიშლებიან, საამ ყველა დაკავებული არ გათავისუფლდება. დაპატიმრებულთა ნაწილი გუშინ გვიან ღამით გაათავისუფლეს, 9 პირი კი, ამ დრომდე წინასწარი დაკავების იზოლატორში იმყოფება. მათგან 6-ს ადმინისტრაციულ ჯარიმას დააკისრებენ, 3 კი სისხლის სამართლებრივ პასუხისგებაში მიეცემა.