გამოცდების ეროვნული ცენტრის ინფორმაციით, 2013 წლის ერთიანი ეროვნული გამოცდების პროცესში მონაწილე 42 000 აბიტურიენტიდან 4 სავალდებულო საგანში მინიმალური კომპეტენციის ზღვარი 28 401-მა აბიტურიენტმა გადალახა, 13 000-ზე მეტი აბიტურიენტი კი, სტუდენტის სტატუსის გარეშე დარჩა.

უკვე ცნობილია საგრანტო კონკურსის მონაცემებიც. ერთიანი ეროვნული გამოცდები 2013-ში მონაწილე აბიტურიენტაგან 50, 70 და 100%-იანი სახელმწიფო დაფინანსება 9 000-მდე სტუდენტმა მოიპოვა.

გამოცდების ეროვნული ცენტრის დირექტორის მაია მიმინოშვილის განცხადებით, მიუხედავად იმისა, რომ 13 000-ზე მეტმა აბიტურიენტმა მინიმალური კომპეტენციის ზღვარი ვერ გადალახა, გასულ წლებთან შედარებით, წელს გაცილებით მეტი სკოლადამთავრებული გახდა სტუდენტი.

"წელს გაცილებით მეტი აბიტურიენტი გახდა სტუდენტი ვიდრე წინა წლებში. 28 401 აბიტურიენტი უკვე სტუდენტია მაშინ, როცა წინა წლებში დაახლოებით 24 000 აბიტურიენტი ხდებოდა სტუდენტი. რადიკალურად გაიზარდა იმ სტუდენტების რაოდენობა, რომლებმაც სრული დაფინანსება მოიპოვეს. თუ უმაღლესი სასწავლებლების რეიტინგულ სიას და იმ ჩარიცხული სტუდენტების რაოდენობას, რომლებმაც სრული დაფინანსება მოიპოვეს, გადავხედავთ, წელს პირველად ლიდერობს ჯავახიშვილის უნივერსიტეტი,"- განაცხადა მაია მიმინოშვილმა.

აბიტურიენტებს ერთიანი ეროვნული გამოცდები 2013-ის საბოლოო შედეგების ნახვა გამოცდების ეროვნული ცენტრის ვებ-გვერდზე უკვე შეუძლიათ.