საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო დევნილთა რეგისტრაციას რაჭა-ლეჩხუმსა და ქვემო სვანეთში განაგრძობს. დღეს, მინისტრმა დავით დარახველიძემ, ოჯახთან ერთად, ამბროლაურის მუნიციპალიტეტში დევნილთა ხელახალი რეგისტრაცია გაიარა.
„დღეს მე გავიარე სავალდებულო რეგისტრაცია, როგორც დევნილმა, ასევე ჩემი ოჯახის წევრები გადიან რეგისტრაციას. პროცესები გამართულია კომისია კარგად მუშაობს" - განაცხადა მინისტრმა დავით დარახველიძემ.
რეგისტრაცია, ქვეყნის მასშტაბით, 1 აგვისტოდან სამეგრელო- ზემო სვანეთსა და კახეთის რეგიონებში დაიწყო, ამ ეტაპისთვის რეგისტრაცია 36 000-ზე მეტმა დევნილმა გაიარა. რეგისტრაციის გავლა სავალდებულოა ყველა დევნილისათვის, რათა მათ არ შეუჩერდეთ დევნილის შემწეობა და ასევე განისაზღვროს მათი ზუსტი რაოდენობა.
დავით დარახველიძე - „რეგისტრაციის ჩატარების აუცილებლობაზე სათათბირო სამჭომ გადაწყვეტილება ჯერ კიდევ წლის დასაწყისში მიიღო. მას შემდეგ, რაც სამუშაოები კერძო სექტორის დევნილთა აღრიცხვისთვის ჩაატარა. არსებობს ინფორმაცია, რომ სხვადასხვა დროს, სხვადასხვა ფორმით ხდებოდა დევნილის სტატუსის ყალბად აღება. გარდა ამისა, ბოლოს ჩატარებული რეგისტრაციიდან 5 წელი გავიდა. მოგეხსენებათ, არსებობს სერიოზული მიგრაცია და იმისათვის, რომ განგვესაზღვრა დევნილი ოჯახების ზუსტი რიცხვი, მიღებული იქნა გადაწყვეტილება ჩატარებულიყო საყოველთაო რეგისტრაცია. ამის შესახებ მთავრობამ გასცა განკარგულება".
ამბროლაურის მუნიციპალიტეტში, მინისტრთან ერთად, რეგისტრაცია სხვა დევნილებმაც გაიარეს.
დევნილი თამარ კობახიძე - ცხელ ხაზზე დავრეკე, მოვედით უპრობლემოდ გავიარეთ რეგისტრაცია მე და ჩემმა შვილებმა. ასევე, მინისტრსაც გავესაუბრე და მივიღეთ ინფორმაციები ბინების მშენებლობის თაობაზე. ყველაფერმა მშვიდ გარემოში ჩაიარა.
დევნილთა რეგისტრაცია 1 აგვისტოდან დაიწყო და 27 დეკემბრამდე გაგრძელდება.