26 აგვისტოს, წყალტუბოში, ჩხობაძის ქუჩის კომპაქტურ ჩასახლებაში 150-მდე დევნილს ახლად აშენებული კოტეჯები გადაეცემა. 35 კოტეჯი შვეიცარიის განვითარების სააცენტოს დაფინანსებით აშენდა, დევნილთა სამინისტრომ კი კოტეჯები საკანალიზაციო სისტემითა და გარე კომუნიკაციით უზრუნველყო, რისთვისაც 100 000 ლარი სამინისტროს ბიუჯეტიდან გამოიყო. დევნილებს, ახალი საცხოვრებლის გასაღებს პირადად მინისტრი გადასცემს. აღნიშნულ ჩასახლებაში, დევნილები დღემდე ხის კოტეჯებში ცხოვრობდნენ, რომლებიც დროთა განმავლობაში დაძველდა და რამდენიმე მათგანი ჩამოინგრა კიდეც. პროექტი, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს და შვეიცარიის განვითარების სააგენტოს ორმხრივი მოლაპარაკების შედეგად განხორციელდა.
მასალის გამოყენების პირობები
