ტელეკომპანია 'მეცხრე არხის' მაუწყებლობის 1-ელ სექტემბრამდე შესაძლო აღდგენას ტელევიზიის თანამშრომლები არ ადასტურებენ.
როგორც "ჯი-ეიჩ-ენს" ტელეკომპანიის საინფორმაციო გამოშვების ყოფილმა წამყვანმა სოფო ჩაკვეტაძემ განუცხადა, "მეცხრე არხის" თანამშრომლებს მსგავს საკითხზე საუბარი არ ჰქონიათ.
"დილიდან ტელევიზიაში ვართ ყველა, თუმცა მსგავს თემაზე საუბარი არ ყოფილა. მსგავსი შინაარსის ინფორმაცია სოციალურ ქსელში ვნახეთ და ცოტა არ იყოს გაგვიკვირდა. ამჟამად არხის გენერალური დირექტორიც არ იმყოფება აქ, დასავლეთშია წასული,"- განაცხადა სოფო ჩაკვეტაძემ.
რაც შეეხება საქართველოს პრემიერ-მინისტრ ბიძინა ივანიშვილის მიერ ტელეკომპანია "მეცხრე არხის" დახურვის ფაქტის კომენტირებისას ტელევიზიის თანამშრომლების და ხელმძღვანელობის შესახებ გაკეთებულ შეფასებს, სოფო ჩაკვეტაძემ კომენტარის გაკეთება არ ისურვა.
ცნობისთვის, გავრცელებული ინფორმაციის თანახმად, საქართველოს პრემიერ-მინისტრის განცხადებების შემდეგ, ტელეკომპანია "მცხრე არხის" თანამშრომლებმა არხის მაუწყებლობის პირველ სექტემბრამდე განახლება გადაწყვიტეს.
"ძალიან სამწუხარო იყო, როგორც ჟურნალისტები და არხის ხელმძღვანელობა მოიქცნენ. განცხადებიდან, საინფორმაციო გამოშვების შემდეგ დახურეს ტელევიზია. ამ დროს, თვითონვე ჰქონდათ მათ ეს განცდა, რომ ძალიან ბევრია მყიდველი და მსურველი, რომლებიც მე ვერ ვნახე ისეთი დახურული ქმედებით, როგორიც ვმოქმედებდი, რომ ტელევიზიის ირგვლივ აჟიოტაჟი არ გამომეწვია და ამით ტელევიზიას ჩრდილი არ მიყენებოდა. მე ყველა პოტენციურ მყიდველთან საუბარს ვახერხებდი და წინა პარასკევს საბოლოოდ, ბოლო მყიდველმა უარი თქვა. ამის შემდეგ მე ქალბატონ ლუბა ელიაშვილს მოველაპარაკე, ავუხსენი მდგომარეობა და ვუთხარი, რომ ამაზე გვიან უკვე უხერხული იქნებოდა ტელევიზიის დახურვა და ის განცხადება გავაკეთეთ, როგორიც გავაკეთეთ. ჩემთვის ძალიან უცნაური იყო ჟურნალისტების რეაქცია და თვითონ ხელმძღვანელობის რეაქცია, რომ ადგნენ და გათიშეს არხი. ამ დროს, როგორც თვითონ მიმტკიცებენ, რომ ძალიან ბევრია მსურველი ყიდვისა, შეიძლებოდა არხი კიდევ 10 დღე ყოფილიყო. თუმცა მე ძალიან ეჭვი მეპარება ამაში, რომ სერიოზული მყიდველი იყოს. თუ იქნება, მე მოხარული ვიქნები. ჩემს განცხადებაში კარგად აღვნიშნე, რომ ჩემთვის ძალიან უხერხულია მედიასაშუალებების მეპატრონე ვიყო, რამეთუ მე დღეს ქვეყნის მთავრობის მეთაური ვარ. ამას გაგებით უნდა მოეკიდოთ. ეს არის დღეს ჩემი პოზიცია. ამავდროულად, მე ძალიან ვცდილობ, რომ ყველა ჟურნალისტს, ყველა ჩვენს მოქალაქეს მაქსიმალური პასუხისმგებლობით მოვეკიდო და თითოეული მათგანის ინტერესი მაქიმალურად გავითვალისწინო. მაგრამ ასეთი გაგებით, როგორც ახლა მოეკიდნენ, ჩემთვის ძალიან გულსატკენია რომ ლამის აქეთ დამამადლეს. ეს ათი თვე 10 მილიონი დოლარი მხოლოდ ჟურნალისტების გულისთვის დავხარჯე, აბა მე მეტი არაფერი მიზანი არ მქონია და არაფერი დაკვეთები მიმიცია არც ადრე "მეცხრე არხისთვის" და მით უმეტეს იმის შემდგომ, რაც ხელისუფლებაში მოვედით. ის დამოკიდებულება რომ გამოვიყენე, წარმოიდგინეთ, რომ არჩევნების შემდგომ ეს დამეხურა რა მოხდებოდა და როგორი აჟიოტაჟი მოჰყვებოდა. ვფიქრობ, რომ სწორი გადაწყვეტილება მივიღე. ჟურნალისტების რეაქცია იყო ჩემი აზრით არაპროფესიონალური და კარგად მესმის, იმიტომ, რომ იქ უმეტესობა იყო არაპროფესიონალი. ამიტომაც მიიღეს ასეთი გადაწყვეტილება. პროფესიონალები ასე არ მოიქცეოდნენ, ვინც მის პროფესიას პატივს სცემს, რომ განცხადების შემდეგ ადგნენ და არხი მიახურეს. თუ ისინი საკუთარ პროფესიას პატივს სცემენ და ჟურნალისტები არიან, ასე არ უნდა მოქცეულიყვნენ. თანაც ძალიან სამწუხაროა, რომ თქვენ თვითონვე გაქვთ ისეთი განწყობა, რომ უამრავი მყიდველია, რასაც მე სკეპტიკურად ვუყურებ. მაგრამ, თუ თქვენებურად არის, მით უმეტეს რისთვის დაიხურა ტელევიზია?! გაგეგრძელებინათ, მაყურებელს ხომ უნდა სცეთ პატივი, არა?! თქვენ ხომ მაყურებელი გყავდათ?! რატომ დახურეს ასე?! ასეა დაახლოებით ჩემი დამოკიდებულება,"- განაცხადა ბიძინა ივანიშვილმა.