"ჯი-ეიჩ-ენის" ინფორმაციით, "ომეგა ჯგუფის" დამფუძნებელი ზაზა ოქუაშვილი საქართველოში სავარაუდოდ, უახლოეს დღეებში დაბრუნდება და ტელეკომპანია "მეცხრე არხის" და საინფორმაციო სააგენტო "ინფო 9"-ის შეძენასთან დაკავშირებით მოლაპარაკებების დაწყებას გეგმავს. აღნიშნულ საკითხზე "ჯი-ეიჩ-ენი" ტელეკომპანია "მეცხრე არხის" გენერალურ დირექტორს ლუბა ელიაშვილს დაუკავშირდა.
მისი თქმით, იგი ამ ეტაპზე მსგავს ინფორმაციას არ ფლობს. "მსგავსი საკითხები მე არ მეხება. არხის შესაძენად მოლაპარაკებები ფინანსისტებთან წარმოებს და შესაბამისად, ოქუაშვილის შესაძლო ჩამოსვლასთან დაკავშირებით საქმის კურსში არ ვარ,"- განაცხადა ლუბა ელიაშვილმა.
"მეცხრე არხის" გენერალურმა დირექტორმა უარყო ინფორმაცია იმის შესახებაც, რომ პრემიერ-მინისტრ ბიძინა ივანიშვილის ოჯახის საკუთრებაში არსებული მედიასაშუალებების შესაძენად მოლაპარაკებებს ბიზნესმენი ლევან ვასაძეც აწარმოებს.
შეგახსენებთ, რომ "ომეგა ჯგუფის" დამფუძნებელს, ზაზა ოქუაშვილს ტელეკომპანია "მეცხრე არხის" შეძენის სურვილი აქვს და ამ მიზნით ახრის მფლობელთან მოლაპარაკებებს იწყებს. აღნიშნულის შესახებ ტელეკომპანია "მეცხრე არხის" გენერალურმა დირექტორმა ლუბა ელიაშვილმა "ჯი-ეიჩ-ენთან" საუბრისას განაცხადა.
"ტელეკომპანია "იბერია" იბრუნებს სიხშირეს, რომელიც მას უკანონოდ წაართვეს. ოქუაშვილს უბრუნდება კუთვნილი, უკანონოდ წართმეული ლიცენზია და მას პირველ რიგში თანამშრომლები სჭირდება და შემდეგ - აპარატურა. მოგეხსენებათ, ბიზნესმენია და ფული აქვს. "მეცხრე არხს" შეიძენს ისეთს, როგორიც არის, მედიასაშუალებების გაყიდვასთან დაკავშირებით, ფინანსისატები მუშაობენ და აღნიშნული ტელეკომპანიის და საინფორმაციო სააგენტოს გასაყიდი ფასი დადგინდება," - განაცხადა ლუბა ელიაშვილმა.
არსებული ინფორმაციით, "ომეგა ჯგუფის" დამფუძნებელი ზაზა ოქუაშვილი ლონდონში იმყოფება.