დღეს. სასტუმრო „ჰოლიდეი ინნ"-ში ქართველი და უკრაინელი ტურ-ოპერატორების შეხვედრა გაიმართა. შეხვედრაზე საქართველოს ტურიზმის ეროვნული ადმინისტრაციის ხელმძღვანელობამ საქართველოს ცალკეული ტურისტული მიმართულებებისა და პროდუქტების შესახებ ისაუბრა.
ადმინისტრაციის ინიციატივით და ორგანიზებით, 19 აგვისტოდან 23 აგვისტოს ჩათვლით უკრაინის ტურ-ოპერატორებს, საშუალება აქვთ გაეცნონ ქვეყნის ღირსშესანიშნაობებს, ასევე შეხვდნენ ადგილობრივ ტურ-ოპერატორებს და განიხილონ სამომავლო თანამშრომლობის გეგმები. აღსანიშნავია, რომ ტურის განმავლობაში მონაწილეები უკვე ეწვივნენ ბათუმს. თბილისის შემდეგ ისინი გუდაურში, სტეფანწმინდასა და ბაკურიანში გაემგზავრებიან.
ტურიზმის ეროვნულ ადმინისტრაციაში განმარტავენ, რომ უკრაინა ერთ-ერთი მნიშვნელოვანი ბაზარია საქართველოსთვის. ტურიზმის ეროვნული ადმინისტრაცია უკრაინაში საქართველოს ტურისტული პოტენციალის პოპულარიზაციისათის ფართო მასშტაბიან სარეკლამო კამპანიას ეწევა. ქუთაისის აეროპორტიდან უკვე ხორციელდება რეგულარული რეისები კიევის, ხარკოვის და დონეცკის მიმართულებით. ამ დროისთვის 2013 წლის პირველი 7 თვეში უკრაინიდან საქართველოში 64 000 საერთაშორისო მოგზაური ჩამოვიდა, რაც გასულ წლის ანალოგიური პერიოდის მაჩვენებელს 71 % აღემატება.
