საქართველოს უსინათლოთა კავშირი სოციალური შეღავათების გაორმაგებას ითხოვს. მათი თქმით, 2013 წლამდე შეღავათის სახით, ყოველთვიურად 22 ლარს იღებდნენ და აღნიშნული დახმარება მიმდინარე წლის იანვრიდან შეუწყდათ.
უსინათლოები დედაქალაქში შესაბამისი ინფრასტრუქტურის არარსებობასაც უჩივიან და ხმოვანი შუქნიშნების და საგზაო პანდუსების დამონტაჟებასაც ითხოვენ.
"ვერ ვიმუშავებთ ვერსად, ვერ ვივაჭრებთ და ვერაფერს მოვიპარავთ. ამიტომ ,მთავრობას ვთხოვთ, ყურადღება მოგვაქციოს, როგორც განსაკუთრებული კატეგორიის მქონე ინვალიდებს პენსიაც მოგვიმატონ და ჩვენი 22 ლარიანი დახმარება გაგვიორმაგონ,"- განაცხადა უსინათლოთა კავშირის წევრმა ზაურ მაისურაძემ.
უსინათლოთა კავშირის წარმომადგენელთა მოთხოვნებს და პრეტენზიებს თბილისის საკრებულოში უპასუხეს. დედაქალაქის საკანონმდებლო ორგანოს ჯანდაცვის კომიტეტის თავმჯდომარის მაკა გვარამიას განცხადებით, აღნიშნულ პირთა მოთხოვნების განხილვა როგორც მუნიციპალურ ხელისუფლებასთან, ასევე ცენტრალურ ხელისუფლებასთან იგეგმება.
"როგორც მუნიციპალურ ხელისუფლებასთან, ასევე ცენტრალურ ხელისუფლებასთან იგეგმება ამ საკითხებზე საუბარი და მათთვის ყველაზე მნიშვნელოვან პრიორიტეტებს ამოვირჩევთ, რომლის დაფინანსებასაც მუნიციპალური ხელისუფლება უზრუნველყოფს",- განაცხადა მაკა გვარამიამ.