უნივერსიტეტის რექტორობის ერთ-ეღტი კანდიდატის გიორგი ქავთარაძის განცხადებით, თსუ-ში დღეს ჩატარებული არჩევნები "საიდუმლო სირობაა", რომელშიც ერთი რექტორის ასარჩევად 12 ადამიანი მონაწილეობს.

"საზოგადოების დიდი ნაწილი არის ავად და მე მინდა ვიკითხო თუ იცით ვინ არის ყველაზე დიდი თანამედროვე ქართველი მწერალი ვინ არის, რომელიც საზოგადოებისთვის აქტუალურია და რომელიც წაკითხული აქვს ახალგაზრდობას და ყველა იცნობს?! ასეთი არის ერეკლე დეისაძე, რომელიც თანამედროვე მწერლობის დიდ ქართველ მწერლად ითვლება და მინდა მსა დავესესხო, რომ საზოგადოებამ კარგად გაიგოს რასთან გვაქვს დღეს საქმე. ის, რაც ახლა ხდება, არის წარმოდგენა, სანახაობა, ეს არის - საიდუმლო სირობა. 12 კაცი იკრიბება, რომელმაც უნდა მიიღოს გადაწყვეტილება და აირჩიოს ერთი რექტორი,"- განაცხადა გიორგი ქავთარაძემ.

ქვეყნის მთავარი უნივერსიტეტის რექტორობის კიდევ ერთი კანდიდატი მერაბ ცაგარელი თსუ-ში დღეს გამართული რექტორის არჩევნების შედეგებს ეჭვქვეშ იმის გამო აყენებს, რომ უნივერსიტეტის რექტორობის ერთ-ერთმა პრეტენდენტმა მარინე ჩიტაშვილმა საბჭოს წინაშე საკუთარი კონცეფციის წარდგენის შემდეგ კანდიდატურა ლადო პაპავას სასარგებლოდ მოხსნა.

"უკანასკნელი ორი დღის მოვლენებმა გარკვეული ეჭვები გააჩინა, ეჭვები იმისა, რომ მაგალითად, მარინე ჩიტაშვილმა ლადო პაპავას სასარგებლოდ მოხნა კანდიდატურა, მას შემდეგ, რაც საბჭოს წინაშე გავიდა, თავისი კონცეფცია მოახსენა და შემდეგ მიიღო ეს გადაწყვეტილება. მანამდე რომ გაეკეთებინა ეს, შესაძლოა ნაკლები ეჭვები გამოეწვია, მაგრამ საბჭოს წინაშე გასვლის შემდეგ ეს გადაწყვეტილება საეჭვოა,,"- განაცხადა მერაბ ცაგარელმა.

ცნობისთვის, ივანე ჯავახიშვილის სახელობის თბილისის სახელმწიფო უნივერსიტეტში რიგით 28-ე რექტორის არჩევნები დღეს ჩატარდა. რექტორობის 12 კანდიდატიდან უნივერსიტეტის აკადემიური საბჭო იმ ერთს აირჩევს, რომელიც მინიმუმ 7 ხმას დააგროვებს. იმ შემთხვევაში, თუ ვერც ერთმა კანდიდატმა 7 ან 7 ხმაზე მეტი ვერ მოაგროვა, რექტორის არჩევნების მეორე ტური გაიმართება, რომელშიც მონაწილეობას მხოლოდ ორი საუკეთესო შედეგის მქონე კანდიდატი მიიღებს.