თბილისის მერია ქალაქში არსებული საავტომობილო ხიდების რეაბილიტაციას იწყებს. თითოეულ ხიდს კვალიფიციური კვლევა ჩაუტარდება, რათა დეტალურად განისაზღვროს მათი მდგომარეობა. კვლევა ხიდების ფიზიკურ დათვალიერებას, კონსტრუქციების შესწავლასა და ხიდების მდგრადობის გამოცდას ითვალისწინებს. კვლევები ორი თვის განმავლობაში ეტაპობრივად, უქმე დღეებში, ღამის განმავლობაში ჩატარდება, რათა ქალაქში მოძრაობა არ შეფერხდეს.
მიმდინარე კვირაში გვიან ღამე გადაიკეტება ბარათაშვილისა და გლდანის(სარაჯიშვილის მეტროსთან მდებარე) ხიდები. მოძრაობა შაბათსაც და კვირასაც დილის 8 საათიდან ჩვეულ რეჟიმში აღდგება.
ასევე შაბათს და კვირას დაგეგმილია მოძრაობის შეზღუდვა მტკვრის მარჯვენა სანაპიროზე ვეფხისა და მოყმის ძეგლიდან თამარ მეფის ხიდამდე არსებულ მონაკვეთზე, რათა გაგრძელდეს კლდის დასუფთავება და დროულად დამონტაჟდეს ქვათა ცვენისგან დამცავი ფოლადის ბადე.
