საქართველოს პრეზიდენტი მიხეილ სააკაშვილი და პრემიერ-მინისტრი ბიძინა ივანიშვილი დღეს ბათუმში ამერიკულ ხომალდ BULKELEY-ს ესტუმრებიან.
BULKELEY-ს კაპიტნის სახელით ხომალდზე საქართველოს ხელისუფლების უმაღლესი თანამდებობის პირების ოფიციალური მიღებაც გაიმართება.
სანაპირო დაცვის დეპარტამენტის ოპერაციების მართვის სამმართველოს წარმომადგენლის შოთა მიროტაძის განცხადებით, ამ წუთებში ამერიკულ სამხედრო ხომალდზე საქართველოს სასაზღვრო და სანაპირო დაცვის სამსახურების წარმომადგენლები ტრენინგებს გადიან.
"გემის ვიზიტის ფარგლებში სანაპირო დაცვის პერსონალის გადამზადების მიზნით, დაგეგმილია სპეციალური სწავლებები. მცირე კატარღების ექსპლუატაციის შესახებ სწავლებები ძირითადად ხომალდზე ჩატარდება. ასევე, საქართველოს ტერიტორიული წყლების დატოვებამდე და ხომალდის გასვლის ბოლო დღეს დაგეგმილია სანაპირო დაცვის კატარღებთან ერთად ერთობლივი სწავლებები,"- განაცხადა შოთა მიროტაძემ.
ამერიკულ სამხედრო ხომალდ BULKELEY-ზე ოფიციალური ღონისძიებების დასრულების შემდეგ, საქართველოში ამერიკის შეერთებული შტატების ელჩი რიჩარდ ნორლანდი და საქართველოს ხელისუფლების უმაღლესი თანამდებობის პირები მედიის წარმომადგენლებთან განცხადებებს გააკეთებენ.
