დიდი ბრიტანეთის საგარეო საქმეთა სამინისტრომ 2008 წლის აგვისტოს ომის შესახებ თავისი გამონათქვამები შეარბილა. ინფორმაციას ამის შესახებ რუსული მედია ავრცელებს.
მათივე ინფორმაციით, დიდმა ბრიტანეთმა კონფლიქტის მონაწილე ყველა მხარეს მოუწოდა იმუშაონ ომის შედეგების მშვიდობიანი გადაწყვეტის გზების ძიებისათვის.
„მოვუწოდებთ კონფლიქტის მონაწილე ყველა მხარეს, მათ შორის რუსეთსაც იპოვონ საიმედო და მშვიდობიანი გამოსავალი", _ განუცხადეს „რია ნოვოსტის" დიდი ბრიტანეთის საგარეო საქმეთა სამინისტროში.
რუსული მედია აღნიშნავს, რომ ადრე დიდი ბრიტანეთის საგარეო საქმეთა სამინისტრო თავის განცხადებებში, რომლებსაც კონფლიქტთან დაკავშირებით აკეთებდა აღნიშნავდა, რომ საქართველოს პოზიციის ერთგული იყო და ისევე როგორც მრავალი ქვეყანა უარს აცხადებდა აფხაზეთისა და სამხრეთ ოსეთის დამოუკიდებლობის აღიარებაზე.
„ბრიტანელების ტონი მნიშვნელოვნად შესუსტდა 2009 წლის ბოლო საერთაშორისო დამოუკიდებელი კომისიის ანგარიშის გამოქვეყნების შემდეგ. ანგარიშში ომის დაწყებაში თბილისია დადანაშაულებული. ამის მიუხედავად, ლონდონის პოზიცია მთლიანობაში უცვლელი დარჩა: დიდი ბრიტანეთი რუსეთს აგრესორად მიიჩნევს, აფხაზეთსა და სამხრეთ ოსეთს კი - უკანონოდ ოკუპირებულ ტერიტორიებად", _ წერს რუსული მედია.