ამის შესახებ პრეზიდენტობის კანდიდატმა ნინო ბურჯანაძემ მუხათგვერდის სამხედრო მოსამსახურეთა სასაფლაოზე 2008 წლის რუსეთ-საქართველოს ომში დაღუპული ჯარისკაცების ხსოვნისათვის პატივის მიგების შემდეგ ისაუბრა, სადაც იგი „სახალხო კრების" თავმჯდომარე ნონა გაფრინდაშვილთან და მისი პარტიისა და კრების წევრებთან ერთად იმყოფებოდა.

„უპირველეს ყოვლისა, მე მინდა კიდევ ერთხელ მოვიხსენიო ყველა ის ადამიანი, ვინც შეეწირა ამ ბრძოლას. ის ბიჭები, რომლებიც აქ, ან თავიანთ მშობლიურ ადგილებში არიან დაკრძალულნი, ნამდვილად გმირები არიან და ნამდვილად ჩვენი სამშობლოს ერთიანობისათვის იბრძოდნენ. ასევე, მინდა მწუხარება გამოვხატო ჩვენივე თანამოქალაქე ოსების მიმართ, რომლებიც დაიღუპნენ ამ ომის დროს და ჩვენ ყველაფერი უნდა გავაკეთოთ იმისათვის, რომ მსგავსი არასოდეს აღარ განმეორდეს. კიდევ ერთხელ მინდა ხაზი გავუსვა: ყველა ის ჯარისკაცი, ყველა ის ადამიანი, ვინც სამშობლოს იცავდა, ნამდვილად გმირია, მაგრამ მათი დაღუპვისათვის აუცილებლად პასუხი უნდა აგონ იმ ადამიანებმა, რომლებმაც საქართველოს არ ააცილეს თავიდან ეს ომი. მე დარწმუნებული ვარ, რომ აგვისტოს ტრაგედიის, რომელიც ყველაზე დიდი ტრაგედია იყო ბოლო წლების განმავლობაში და იმედია უკანასკნელი, ამ ტრაგედიის თავიდან აცილება შეიძლებოდა. მე დარწმუნებული ვარ იმაშიც, რომ იმის გარანტი რომ მსგავსი აღარასოდეს განმეორდეს, არის ის, რომ პასუხი აგონ იმ ადამიანებმა ვინც ამ დანაშაულში მონაწილეობა მიიღეს. სწორედ პრეზიდენტი სააკაშვილი მყავს მხედველობაში. თქვენ იცით ჩემი პოზიცია, აგვისტოს ომი უნდა იყოს გამოძიებული და ყველა ის ადამიანი, რომელმაც არაფერი არ გააკეთა არა მხოლოდ იმისათვის, რომ თავიდან აგვეცილებინა ეს ტრაგედია, არამედ პირიქით, ბევრი ნაბიჯი გადადგა იმისაკენ, რომ აქამდე მივსულიყავით, სააკაშვილის ხელმძღვანელობით პასუხისგებაში უნდა იყვნენ მიცემულნი,"- განაცხადა ნინო ბურჯანაძემ.

შეგახსენებთ, რომ დღეს, 2008 წლის რუსეთ-საქართველოს ომიდან 5 წელი შესრულდა. ოფიციალური მონაცემებით, 5-დღიან ომში საქართველომ 170 სამხედრო, 14 - პოლიციელი და 220 - სამოქალაქო პირი დაკარგა. საომარი მოქმედებების შედეგად, 2 234 ადამიანი დაიჭრა და 26 000 დევნილად იქცა.