"პრეზიდენტის გუშინდელ განცხადებებში ძალიან ბევრი ურთიერთგამომრიცხავი რამ დავინახე,"- ამის შესახებ საქართველოს საგარეო საქმეთა მინისტრმა მაია ფანჯიკიძემ, პრეზიდენტ მიხეილ სააკაშვილის მიერ ტელეკომპანია "რუსთავი 2"-თვის მიცემულ ინტერვიუში გაკეთებული განცხადებების კომენტირებისას ისაუბრა.
"ჩემთვის ძალიან უცნაური იყო თუნდაც იმის წაკითხვა, თუ რა დიალოგი ჰქონია მას გერმანიის საგარეო საქმეთა მინისტრთან. აქედან გამომდინარე, ამაზე მე კომენტარს ვერ გავაკეთებ, რადგან არ ვიცი სინამდვილეში რა და როგორ იყო. ჩვენ ეს ისე უნდა მივიღოთ, როგორც გუშინ გავიგეთ,"- განაცხადა მაია ფანჯიკიძემ.
ცნობისთვის, საქართველოს პრეზიდენტმა მიხეილ სააკაშვილმა ტელეკომპანია "რუსთავი 2"-თვის მიცემულ ინტერვიუში განაცხადა, რომ "მას დასავლეთიდან პირველად გერმანიის საგარეო საქმეთა მინისტრმა ფრანკ-ვალტერ შტაინმაიერმა უთხრა, რომ საქართველოში ომი იქნებოდა".
მისი თქმით, ამის შესახებ შტაინმაიერმა საქართველოს მთავრობის წევრებს ომის დაწყებამდე რამდენიმე დღით ადრე, ბათუმის ერთ-ერთ სასტუმროში განუცხადა.
"აგვისტოს დასაწყისში როცა დაიძაბა სიტუაცია, ჩამოვიდა შტაინმაიერი, გერმანიის საგარეო საქმეთა მინისტრი. ეს იყო პირველი ოფიციალური პირი, რომელმაც დასავლეთიდან გვითხრა, რომ ომი იქნებოდა. გეგმა შემოგვთავაზა, რომელიც იყო ორაზროვანი და მიუღებელი, თუმცა იმდენად გაბრაზებულები ვიყავით, რამეზე რომ ჩაგვეჭიდა ხელი, ამაზეც ვთანხმდებოდით. ჩავიდა გალში და შეხვდა ბაღაფშს, მანამდე იყო მოსკოვში და შემდეგ ჩამოვიდა ბათუმში, სადაც ზღვაზე, ერთ-ერთ ძველ რესტორანში შევხვდით საუზმეზე, აჭარულ ხაჭაპურებზე. თემურ იაკობაშვილმა საუზმის დროს უთხრა, დაგვეხმარებოდა თუ არა დასავლეთი ახალი სამშვიდობო ფორმატის მიღებაში. ამაზე შტაინმაიერმა დადო ჩანგალი და იაკობაშვილს უთხრა - რა ახალი სამშვიდობო ფორმატი ბიჭებო, მალე აქ თქვენ ომი გექნებათო. ამაზე ჩვენ ყველამ ჩანგლები დავყარეთ", - განაცხადა სააკაშვილმა და დასძინა, რომ "მანამდე კონდოლიზა რაისი იძახოდა, დაივიწყეთ ომი, რუსები ამას არ იზამენო".
"კონდოლიზა იძახოდა რა ომი, დაივიწყეთ ეს, რადგან რუსები ამას არ იზამენო. შტაინმაიერმა კი პირიქით გვითხრა, რომ იზამდნენ. შტაინმაიერმა გვითხრა: ახლა ესენი გააგრძელებენ პროვოკაციებს, მერე რაღაც ეტაპზე მოგიხდებათ მათი სამშვიდობო სტატუსის გაუქმება. მერე ისინი სულ უფრო მეტად გესვრიან, გააძლიერებენ თავის ჯარებს და რაღაც მომენტში თქვენ ვალდებულები იქნებით უპასუხოთო, რის შემდეგაც დაიწყება დიდი ომიო და მერე ევროკავშირის ერთადერთი ფუნქცია იქნება შუაში შემოვიდეს და გაგყოთო. სხვა ფუნქცია და ახალ ფორმატზე საუბარი წინასწარ არ იქნებაო. ყველაფერი მოხდა ზუსტად ასე გარდა სამშვიდობო სტატუსის გაუქმებისა. მე რომ სამშვიდობო სტატუსი გამეუქმებინა, იგივე ევროპელები გვეტყოდნენ, თქვენ გააუქმეთ სამშვიდობო სტატუსი და გააკეთეთ პროვოკაცია, რაზეც ბიძია იქ გაბრაზდაო. ანუ მგელი გაბრაზდა ცხვრისგან დაუფიქრებელი ნაბიჯისგანო. ესეც არ გავაუქმეთ ჩვენ და ერთადერთი რასაც გვედავებიან ის არის, რომ სამშვიდობოები იყვნენ იქ და რატომ შეხვედითო. ამის შემდეგ დაიწყო ომი", - განაცხადა სააკაშვილმა.
