"პრეზიდენტი მართალია ერთ შემთხვევაში - სახელმწიფო მოხელეების ქმედებებს ისტორია შეაფასებს, თუმცა ეს შეფასება სააკაშვილისთვის არასახარბიელო იქნება"- ამის შესახებ საქართველოს იუსტიციის მინისტრმა თეა წულუკიანმა, ქვეყნის პრეზიდენტ მიხეილ სააკაშვილის მიერ, ტელეკომპანია "რუსთავი 2"-სთვის მიცემულ ინტერვიუში გაკეთებული განცხადების კომენტირებისას ისაუბრა.
"მე ვეთანხმები საქართველოს პრეზიდენტს, რომელიც აცხადებს, რომ მის საქმიანობას შეაფასებს საქართველოს ისტორია, თუმცა ვფიქრობ, მის შესახებ ისტორიის ვერდიქტი დაახლოებით სამი სიტყვის გარშემო იქნება - ბევრი ლაპარაკი, არაადაექვატურობა და შიში,"- განაცხადა თეა წულუკიანმა.
ცნობისთვის, საქართველოს პრეზიდენტმა მიხეილ სააკაშვილმა ტელეკომპანია "რუსთავი 2"-სთვის მიცემულ ინტერვიუში განაცხადა, რომ "ის, რაც საქართველოს ხელისუფლებამ 2008 წელს გააკეთა, წულუკიანების, კბილაშვილების და ნაცვლიშვილების განსასჯელი არ არის".
მისი თქმით, 2008 წლის აგვისტოს ომში საქართველოს ხელისუფლების მოქმედებებს საქართველოს ისტორია და მომავალი თაობები განსჯის.
"ქართული სახელმწიფო პირველად საუკუნეების განმავლობაში ჩამოყალიბდა. თბილისი მართლა ხდებოდა ამიერკავკასიის ცენტრი, ბათუმი ხდებოდა შავი ზღვის მთავარი სიამაყე და ლაზიკა გახდებოდა და გახდება შავი ზღვის ერთ-ერთი ყველაზე მნიშვნელოვანი პორტი. ჩვენ ამას ყველაფერს ვაკეთებდით. რა გავაკეთეთ 2008 წელს, ეს ვიღაც კბილაშვილების, ნაცვლიშვილების და წულუკიანების განსასჯელი არ არის. მე განმსჯის საქართველოს ისტორია და იმას რასაც ჩვენ ვაკეთებდით განსჯის მომავალი მრავალი თაობა ქართველების. მე დარწმუნებული ვარ, რომ ისტორიის ვერდიქტი იქნება სამართლიანი", - განაცხადა სააკაშვილმა და დასძინა, რომ "საქართველომ ევროატლანტიკურ ინტეგრაციისკენ უნდა გააგრძელოს გზა და არა რუსეთისკენ".
