"საქართველოს ხელისუფლების მთავარი გამოწვევა ჩვენი ტერიტორიული მთლიანობის აღდგენაა, რომელიც აუცილებლად მოხდება, უბრალოდ, დასჭირდება უფრო მეტი დრო, ვიდრე ამას ვფიქრობდით 2008 წლის აგვისტომდე,"- ამის შესახებ სასჯელაღსრულების, პრობაციის და იურიდიული დახმარების საკითხთა მინისტრმა სოზარ სუბარმა ოკუპაციის მუზეუმში გამართულ რუსეთ-საქართველოს ომის ამსახველ ფოტოგამოფენაზე განაცხადა, სადაც 2008 წლის ომის დროინდელი მოვლენების ფოტომასალა იყო წარმოდგენილი.
აღნიშნული ღონისძიების გახსნას საქართველოს სასჯელაღსრულების მინისტრ სოზარ სუბართან ერთად, თავდაცვის მინისტრი ირაკლი ალასანია, მთავრობის სხვა წევრები და დიპლომატიური კორპუსის წარმომადგენლებიც ესწრებოდნენ.
"ეს გამოფენა თავიდან აცოცხლებს იმ მწარე დღეებს, რაც გადავიტანეთ და რა სიმწარეც ჯერ კიდე არ ჩამკვდარა, იმიტომ, რომ კიდევ დიდი ხანი გვემახსოვრება. გვემახსოვრება ის ადამიანები, რომლებმაც თავი შესწირეს სამშობლოს ტერიტორიულ მთლიანობას და იმ დროებით დაკარგულ ტერიტორიებს, რომელთა დაბრუნებაც დღემდე ვერ ხერხდება. რაც შეეხება მთავარ გაკვეთილს, მთავარ გამოწვევას, ეს არის ჩვენი ტერიტორიული მთლიანობის აღდგენა, რომელიც აუცილებლად მოხდება, უბრალოდ, ამას დასჭირდება უფრო მეტი დრო, ვიდრე ამას ვფიქრობდით 2008 წლის აგვისტომდე,"- განაცხადა სოზარ სუბარმა.
ამასთან, დღეს ოკუპაციის მუზეუმში გამართულ ღონისძიებაზე ცნობილი გახდა, რომ უახლოეს მომავალში თავდაცვის სამინისტროს და ეროვნული მუზეუმის ერთობლივი ინიციატივით, სპეციალური მუზეუმი შეიქმნება, სადაც ყველა ის ფოტომასალა იქნება დაცული, რომელიც დამთვალიერებელს საქართველოს შეიარაღებული ძალების მიერ ბოლო პერიოდში განვლილი გზის შესახებ მოუთხრობს.
შეგახსენებთ, რომ დღეს, 2008 წლის რუსეთ-საქართველოს ომიდან 5 წელი შესრულდა. ოფიციალური მონაცემებით, 5-დღიან ომში საქართველომ 170 სამხედრო, 14 - პოლიციელი და 220 - სამოქალაქო პირი დაკარგა. საომარი მოქმედებების შედეგად, 2 234 ადამიანი დაიჭრა და 26 000 დევნილად იქცა.