„რუსმა სამხედროებმა, რომლებიც ხუთი წლის წინ სამხრეთ ოსეთისა და აფხაზეთის დასაცავად დადგნენ, ამ რესპუბლიკების ხალხები ქართველი სამხედროების მიერ განადგურებას გადაარჩინეს", _ განცხადება ამის შესახებ რუსეთის პრემიერ-მინისტრმა დიმიტრი მედვედევმა პარტია „ედინაია როსიას" აქტივთან შეხვედრაზე დღეს გააკეთა.
მისივე თქმით, რუსეთის ფედერაციამ იმ მომენტისათვის დიდსულოვნება გამოავლინა.
„მიმაჩნია, რომ ჩვენმა შეიარაღებულმა ძალებმა, და მთლიანად ჩვენმა ქვეყანამ, იმ მომენტისათის კეთილშობილება, სიმტკიცე გამოავლინა, დაიცა ხალხი, გადაარჩინა ისინი განადგურებას და შექმნა პირობები იმისათვის, რომ უზრუნველყოფილი ყოფილიყო სამხრეთ ოსეთისა და აფხაზეთის განვითარება", _ განაცხადა მედვედევმა და აღნიშნა, რომ რაც შეეხება მომავალს, არსებობს დიდი სურვილი იმისა, რომ საქართველოსთან ნორმალური ურთიერთობები წარიმართოს.
„ძალიან გვინდა, რომ ჩვენი მომავალი მშვიდობიანი იყოს, რომ ჩვენ ნორმალური ურთიერთობა გვქონდეს კავკასიაში მცხოვრებ ყველა ხალხთან და რა თქმა უნდა საქართველოსთან, რომელთანაც ჩვენ კარგი ურთიერთობების დიდი ტრადიცია გაგვაჩნია. ამ ურთიერთობებს რაღაც ავანტიურა ვერ გააფუჭებს, რომელიც იმ პერიოდში ცნობილმა ქართველმა ხელმძღვანელებმა განახორციელეს", _ განაცხადა მედვედევმა და აღნიშნა, რომ ხალხები მაინც კარგად არიან ერთმანეთის მიმართ განწყობილნი, რაც მომავალი მშვიდობიანი განვითარების საფუძველია.