"დარწმუნებული ვარ, რომ პოლიტიკური პარტიული კუთვნილების მიუხედავად, ყველა ყველაფერს გავაკეთებთ რომ საქართველოს მიწა-წყალზე აღარ გამეორდეს ომი"- ამის შესახებ საქართველოს უმაღლესი საკანონმდებლო ორგანოს თავმჯდომარე დავით უსუფაშვილმა მუხათგვერდის სამხედრო მოსამსახურეთა სასაფლაოზე 2008 წლის რუსეთ-საქართველოს ომში დაღუპული ჯარისკაცების ხსოვნისათვის პატივის მიგების შემდეგ ისაუბრა.
პარლამენტის თავმჯდომარის თქმით, "ყველა ერთად, სრულიად საქართველო გლოვობს იმ დღეებს, რომლებიც შეიძლებოდა არ მომხდარიყო".
"მუხათგვერდის სასაფლაოზე დაკრძალული გმირების დამსახურებაა, რომ დღეს საქართველო კვლავ არის დამოუკიდებელი ქვეყანა. სამშობლოს დაცვა - ეს წმინდათა წმინდა მოვალეობაა და რა თქმა უნდა ყველა ჯარისკაცი ამისთვისაცაა მზად, მაგრამ ჩვენ სახელმწიფო და ქვეყანა, ხელისუფლება გვჭირდება იმისთვის, რომ მინიმუმამდე დავიდეს ასეთი მსხვერპლი,"- განაცხადა დავით უსუფაშვილმა.
შეგახსენებთ, რომ დღეს, 2008 წლის რუსეთ-საქართველოს ომიდან 5 წელი შესრულდა. ოფიციალური მონაცემებით, 5-დღიან ომში საქართველომ 170 სამხედრო, 14 - პოლიციელი და 220 - სამოქალაქო პირი დაკარგა. საომარი მოქმედებების შედეგად, 2 234 ადამიანი დაიჭრა და 26 000 დევნილად იქცა.