"ჩვენი ყოველდღიური ვალია, წარსულში დაშვებული შეცდომები მაქსიმალურად გამოვასწოროთ და ამის მისაღწევად ყველაფერი გავაკეთოთ,"- ამის შესახებ საქართველოს ენერგეტიკის მინისტრმა, ვიცე-პრემიერმა კახი კალაძემ მუხათგვერდის სამხედრო მოსამსახურეთა სასაფლაოზე, 2008 წლის რუსეთ-საქართველოს ომში დაღუპული ჯარისკაცების ხსოვნისათვის პატივის მიგების შემდეგ ისაუბრა.
მისი თქმით, "სახელმწიფომ ტერიტორიული მთლიანობის აღდგენისთვის ომში მებრძოლ და ამ ომში დაღუპულ სამხედრო მოსამსახურეებს სათანადო და საკადრისი პატივი უნდა მიაგოს".
"ჩვენი ვალია მოვიგონოთ და საკადრისი პატივი მივაგოთ გმირებს, საკადრისად დავეხმაროთ გმირების ოჯახებს და ჩვენ, მთავრობა ყველაფერს გავაკეთებთ ამისათვის. ჩვენი წარმატება ყველაზე ნათელი სანთელი იქნება მატი სულების მოსაგონებლად,"- განაცხადა კახი კალაძემ.
შეგახსენებთ, რომ დღეს, 2008 წლის რუსეთ-საქართველოს ომიდან 5 წელი შესრულდა. ოფიციალური მონაცემებით, 5-დღიან ომში საქართველომ 170 სამხედრო, 14 - პოლიციელი და 220 - სამოქალაქო პირი დაკარგა. საომარი მოქმედებების შედეგად, 2 234 ადამიანი დაიჭრა და 26 000 დევნილად იქცა.