მუხათგვერდის სასაფლაოზე თავდაცვის მინისტრი ირაკლი ალასანია, ვიცე-პრემიერი კახი კალაძე, ევროატლანტიკურ საკითხებში სახელმწიფო მინისტრი ალექსი პეტრიაშვილი, საგარეო საქმეთა მინისტრი მაია ფანჯიკიძე, უმაღლესი საკანონმდებლო ორგანოს თავმჯდომარე დავით უსუფაშვილი და საპარლამენტო უმრავლესობის ლიდერები იმყოფებოდნენ.

ბიძინა ივანიშვილმა და ხელისუფლების სხვა წარმომადგენლებმა გარდაცვლილი სამხედროების ხსოვნის მემორიალი გვირგვინით შეამკეს და ტერიტორია კომენტარის გარეშე დატოვეს.

ჟურნალისტებთან საუბრისას კომენტარი საქართველოს თავდაცვის მინისტრმა ირაკლი ალასანიამ გააკეთა და აღნიშნა, რომ "მხედრული სული, რომელიც ასწლეულების და ათასწლეულების განმავლობაში ქართველი სამხედროების გამოკვეთილი თვისება იყო, ქვეყნის მომავლის გარანტიაც იქნება".

"ჩვენი გმირების საფლავებთან ყველას ერთადერთი განცდა გვეუფლება, რომ საქართველოში ყველაზე დიდი იარაღი და ყოველთვის ყველაზე თანამდეროვე და ძლიერი იარაღი ჩვენი მეომრების გაუტეხელი სული იყო. მე დარწმუნებული ვარ, რომ წარსულში ეს გვამარცხებინებდა ჩვენს მტრებს და ეს მომავალშიც საქართველოს წამატებების და განვითარების გარანტი იქნება. ამიტომ, მხედრული სული, რომელიც ასწლეულების და ათასწლეულების განმავლობაში ჩვენი სამხედროების გამოკვეთილი თვისება იყო, ჩვენი მომავლის გარანტიაც იქნება,"- განაცხადა ირაკლი ალასანიამ.

მუხათგვერდის სამხედრო მოსამახურეთა სასაფლაოზე მისული საგარეო საქმეთა მინისტრის მაია ფანჯიკიძის განცხადებით, " ომში დაღუპული გმირების ოჯახებს სახელმწიფო სათანადოდ უნდა დაუდგეს მხარში და მათ მიღებული ტრაგედია შეუმსუბუქოს".

"მე მინდა საქართველოსთვის დაღუპული მეომრების ხსოვნას პატივი მივაგო. მთავარი, რაც ახლა ახლმა ხელისუფლებამ უნდა გააკეთოს და აკეთებს კიდეც, არის ის, რომ დაღუპული მეომრების ოჯახებს ყველანაირი დახმარება გაუწიოს. მათთვის მამების, შვილების, ძმების დაბრუნებას ვერავინ შეძლებს, მაგრამ სახელმწიფომ მათ უნდა შეუმსუბუქოს მათი ოჯახების და მთლიანად საქართველოს მიერ განცდილი მძიმე დანაკლისი,"- განაცხადა მაია ფანჯიკიძემ.

შეგახსენებთ, რომ დღეს, 2008 წლის რუსეთ-საქართველოს ომიდან 5 წელი შესრულდა. ოფიციალური მონაცემებით, 5-დღიან ომში საქართველომ 170 სამხედრო, 14 - პოლიციელი და 220 - სამოქალაქო პირი დაკარგა. საომარი მოქმედებების შედეგად, 2 234 ადამიანი დაიჭრა და 26 000 დევნილად იქცა.