რუსეთის ფედერაციის პრემიერ-მინისტრ დიმიტრი მედვედევის განცხადებით, "თუ აფხაზებთან და ოსებთან ნორმალური ცხოვრების აწყობის ერთობლივი სურვილი იქნება, რუსეთი ამას ხელს არასოდეს შეუშლის", - ამის შესახებ მედვედევმა ტელეკომპანია "რუსთავი"-ის ჟურნალისტ ნინო შუბლაძისთვის მიცემულ ექსკლუზიურ ინტერვიუში განაცხადა და აღნიშნა, რომ "აფხაზეთთან დაოსეთთან დაკავშირებით სამომავლო გადაწყვეტილებების მიღება დამოკიდებულია ხალხებზე".
"ეს გადაწყვეტილება მე მივიღე. მე მას ვთვლი ერთადერთ სწორ გადაწყვეტილებად კონკრეტულ სიტუაციაში. ამ გადაწყვეტილების გადახედვისთვის ამჟამად, რა თქმა უნდა, არანაირი გარემოებები არ არსებობს. ეს იქნებოდა ძალიან უხეში შეცდომა, რაც ამ ხალხებს არსებობისთვის უაღრესად რთულ პირობებს შეუქმნიდა. შესაძლოა, განადგურების პირობებსაც კი გარკვეულ სიტუაციებში. იმედი მაქვს, რომ ეს პირობები აღარ განმეორდება, რადგან თქვენთანაც ყველაფერი იცვლება - ხელისუფლება იცვლება, ადამიანების მიდგომებიც იცვლება, მაგრამ მაინც. რაც შეეხება მომავალს, ეს შეიძლება მხოლოდ ზეცაში იცოდნენ. მომავალი დამოკიდებულია ხალხებზე, მათზე, ვინც თქვენთან ცხოვრობს, ქართველებზე, მთლიანად საქართველოზე, მათზე, ვინც იმ ტერიტორიებზე სახლობს, რომლებიც ჩვენ მიერ აღიარებულია საერთაშორისო სამართლის სუბიექტებად, ხალხის კოლექტიურ ნებაზე. ყველაფერი შეიძლება, განვითარდეს სულ სხვადასხვა სცენარით, მაგრამ ნებისმიერი დაახლოება, ნებისმიერი დიალოგი უნდა იყოს დაფუძნებული ხალხის ნებაზე და არა სამხედრო ძალაზე. თუ იქნება თანამშრომლობის, ნორმალური ცხოვრების აწყობის ერთობლივი სურვილი, რუსეთი ამას ხელს არასოდეს შეუშლის, ამაში ეჭვი არ შეგეპაროთ. ჩვენთვის უფრო მნიშვნელოვანია, რომ ამ რეგიონში მშვიდობა იყოს", - განაცხადა დიმიტრი მედვედევმა.