რუსეთის ფედერაციის პრემიერ-მინისტრ დიმიტრი მედვედევის განცხადებით, "აფხაზეთისა და სამხრეთ ოსეთის პრობლემების მოგვარებას საქართველოს სხვადასხვა მმართველები ან უვარგისი მეთოდებით, ან უგუნურად, ან დანაშაულებრივად ცდილობდნენ".
ამის შესახებ მედვედევმა ტელეკომპანია "რუსთავი"-ის ჟურნალისტ ნინო შუბლაძისთვის მიცემულ ექსკლუზიურ ინტერვიუში განაცხადა და აღნიშნა, რომ "რუსეთის ფედერაციას საქართველოს კონფლიქტურ რეგიონებში მოქმედების არავითარი წინასწარ გაწერილი გეგმები და განზრახვები არ გააჩნდა".
"ეს არ არის რუსეთსა და საქართველოს შორის პრობლემა. ეს არის ურთიერთობის პრობლემა საქართველოსა და თქვენთვისაც და ჩვენთვისაც ახლობელ ხალხებს - ოსებს და აფხაზებს შორის. კიდევ ერთხელ ვამბობ, ეს არ არის სახელმწიფოთა შორის ურთიერთობის პრობლემა. ჩვენ ასეთი პრობლემა არ გვჭირდებოდა. სამწუხაროდ, მის გადაწყვეტას საქართველოს სხვადასხვა მმართველები (არ მინდა ცალკე არც ერთის დასახელება), ან უვარგისი მეთოდებით, ან უგუნურად, ან დანაშაულებრივად ცდილობდნენ და ეს სამწუხაროდ, ძლიერ დასანანია. რაც შეეხება მომზადების გეგმებს, რა თქმა უნდა შეიძლება საუბარი იმაზე, რომ ჩვენ ვცდილობდით დავხმარებოდით ამ ორ ხალხს, რომლებიც შესაბამისი თხოვნით მოგვმართავდნენ, მაგრამ ჩვენ არასოდეს გვქონია საომარი გეგმები. ჩვენ ეს არ გვჭირდებოდა. პირიქით, ჩვენ ყველანაირად ვცდილობდით თავიდან აგვერიდებინა ეს კონფლიქტი. ჩვენ გვესმოდა, რომ პოტენციურად ეს შესაძლებელი იყო და მაინც სხვადასხვა სიტუაციებში დასმულ კითხვებზე მე არაერთხელ მიპახუსია. იმის მიუხედავადაც კი, რომ ჩვენ გვქონდა ასეთი ეჭვები, ყველაფერი რაც მოხდა, ეს რა თქმა უნდა იყო ანომალია, ძალიან უხეში შეცდომა, რომელიც სამხედრო დანაშაულში გადაიზარდა,"- განაცხადა დიმიტრი მედვედევმა.