საქართველოსა და ევროკავშირს შორის ღრმა და ყოვლისმომცველი თავისუფალი ვაჭრობის შეთანხმებაზე მოლაპარაკებები დასრულდა, რომელიც თავის მხრივ ასოცირების შეთანხმების ნაწილია - აღნიშნულის შესახებ განცხადება დღეს ეკონომიკისა და მდგრადი განვითარების მინისტრმა გიორგი კვირიკაშვილმა გააკეთა.
მინისტრის თქმით, მოლაპარაკების პროცესის დასრულება მნიშვნელოვანი წინგადადგმული ნაბიჯია მიმდინარე წლის ნოემბერში, აღმოსავლეთ პარტნიორობის ვილნიუსის სამიტის წინ. დღეიდან იწყება მუშაობა შეთანხმების ტექსტის სამართლებრივ ექსპერტიზაზე და მის ხელმოსაწერად მომზადებაზე.
„დღეს ოფიციალურად შეგვიძლია ვთქვათ, რომ ბოლო დეტალებიც შეთანხმდა და დღეს დასრულდა ოფიციალურად საქართველოსა და ევროკავშირს შორის თავისუფალი სავაჭრო სივრცის შესახებ ყოვლისმომცველი და მრავალმხრივი შეთანხმება, ე.წ. DC FTA. ეს არის ბოლო ნაბიჯი ვილნიუსში დაგეგმილი სამიტის წინ. შეთანხმება გულისხმობს არამხოლოდ სატარიფო ლიბერალიზაციას, არამედ საქართველოში ნაწარმოები პროდუქციისა და მომსახურებისთვის ტექნიკური ბარიერების მოხსნას, ევროკავშირის ბაზარზე შესვლისათვის. მნიშვნელოვანია, რომ დოკუმენტი მოიცავს 28 ქვეყანას, სადაც 0,5 მლრდ-ზე მეტი მომხმარებელი ცხოვრობს. დღეს ევროკავშირი გახლავთ საქართველოსთვის უმსხვილესი სავაჭრო პარტნიორი. ევროკავშირთან 2,8 მლრდ დოლარის სავაჭრო ბრუნვა გაგვაჩნია. აქედან იმპორტი 2,4 მლრდ დოლარი, ხოლო ექსპორტი 400 მლნ დოლარია. ახლა იწყება ხელშეკრულების სამართლებრივი ექსპერტიზა და მისი ხელმოსაწერად მომზადება"- განაცხადა კვირიკაშვილმა.
მინისტრის განმარტებით, ამ შეთანხმებაზე მოლაპარაკებების მაქსიმალურად სწრაფად და ამავე დროს ხარისხიანად დასრულება ახალი მთავრობის ერთ-ერთ ძირითად პრიორიტეტს წარმოადგენდა.
„ეს არის საქართველოს ევროპული არჩევანის კიდევ ერთი დადასტურება და განსაკუთრებით აღსანიშნავია, რომ როგორც მოლაპრაკებების პროცესმა აჩვენა, ევროპელ პარტნიორებთან საქართველოს ურთიერთნდობასა და ურთიერთგაგებაზე დაფუძნებული მჭიდრო და ეფექტური თანამშრომლობა აქვს"- აღნიშნა კვირიკაშვილმა.
ამ შეთანხმებით, მისი ძალაში შესვლის შემდეგ, საქართველო მიიღებს შესაძლებლობას თავისუფალი ვაჭრობის რეჟიმში მოახდინოს როგორც საქონლის, ასევე, რაც ძალზე მნიშვნელოვანია, მომსახურებების ექსპორტი ევროკავშირში.
მინისტრი განმარტავს, რომ შეთანხმება გულისხმობს არამარტო საიმპორტო ტარიფების ლიბერალიზაციას, არამედ ვაჭრობაში ტექნიკური ბარიერების მოხსნასაც. წვდომა ევროკავშირის, მსოფლიოში ერთ-ერთ უმსხვილეს და მდიდარ ბაზარზე არის მძლავრი იმპულსი ქართული ბიზნესისა და ექსპორტის განვითარებისათვის. ეს შეთანხმება ასევე მნიშვნელოვნად ზრდის საქართველოს მიმზიდველობას პირდაპირი უცხოური ინვესტიციებისათვის.
,,მდგრად ვაჭრობაზე ზეგავლენის შეფასების" შესახებ დამოუკიდებელმა კვლევამ, რომელიც ევროკავშირმა ჩაატარა, აჩვენა, რომ ღრმა და ყოვლისმომცველი თავისუფალი სავაჭრო სივრცე საქართველოდან ევროკავშირში ექსპორტს 12%-ით, ხოლო ევროკავშირიდან იმპორტს - 7.5%-ით გაზრდის. ვაჭრობასთან დაკავშირებული რეფორმების სრულად განხორციელებამ გრძელვადიან პერსპექტივაში შესაძებელია გამოიწვიოს საქართველოს მშპ-ს ზრდა + 4.3%-ით (292 მლნ).
შეგახსენებთ, რომ ღრმა და ყოვლისმომცველი თავისუფალი ვაჭრობის შეთანხმებაზე მოლაპარაკებების პროცესში გაიმართა ექვსი რაუნდი თბილისსა და ბრიუსელში, ასევე რამდენიმე ათეული ვიდეოკონფერენცია. საქართველოს ეკონომიკისა და მდგრადი განვითარების სამინისტროს ხელმძღვანელობით მიმდინარე მოლაპარაკებების პროცესში საქართველოს მთავრობის ყველა შესაბამისი სამინისტრო და უწყება მონაწილეობდა.
აღშანიშნავია, რომ DC FTA მისცემს შესაძლებლობას ქართველ მეწარმეებს, გარკვეული პირობების დაკმაყოფილების შემთხვევაში, თავისუფლად შევიდნენ მსოფლიოს უმსხვილეს ბაზარზე, რომელიც ამ ეტაპზე აერთიანებს 28 ქვეყანას და 500 მილიონზე მეტ მომხმარებელს. საქონლისა და მომსახურების თავისუფალი გადაადგილება ხელს შეუწყობს საქართველოს საექსპორტო პოტენციალის ზრდას.
ევროკავშირს პრეფერენციული სავაჭრო შეთანხმება გაფორმებული აქვს 45 ქვეყანასთან. აღმოსავლეთ პარტნიორობის ფარგლებში, DC FTA-ის გაფორმებაზე მიმდინარეობს მოლაპარაკებები მოლდოვასა და სომხეთთან. უკრაინასთან შეთანხმება უკვე ინიცირებულია.
როგორც ცნობილია, ევროკავშირი საქართველოს ერთ-ერთი უმსხვილესი სავაჭრო პარტნიორია, რომელსაც საქართველოს სავაჭრო ბრუნვის 27% უკავია და საშუალოდ 2.8 მილიარდ აშშ დოლარს აღწევს. საქართველოდან ევროკავშირში ძირითადად სასოფლო - სამეურნეო პროდუქციის ექსპორტი ხორციელდება. უფრო კონკრეტულად კი საქართველოდან ევროკავშირში იგზავნება: თხილი და კაკალი, ღვინო, მინერალური წყლები, სპირტიანი სასმელები, ხილისა და ბოსტნეულის წვენები, უალკოჰოლო სასმელები, ცხოველური ტყავები და ა.შ.
ასევე, სამრეწველო პროდუქცია - მინერალური სასუქები, სპილენძის მადნები და კონცენტრატები; შავი ლითონის და სპილენძის ჯართი და ნარჩენები; მანგანუმის ოქსიდები.
2008-2012 წლებში ევროკავშირის მიერ საქართველოში განხორციელდა 1.9 მილიარდი აშშ დოლარის ინვესტიცია, რაც ამ პერიოდში განხორციელებული მთლიანი ინვესტიციების 38% შეადგენს.
