ტურისტულ ობიექტებში მომსახურების სფეროს გაუმჯობესების მიზნით, ტურიზმის ეროვნულ ადმინისტრაციაში ახალი სამსახური იქმნება, რომლის ჩამოყალიბების იდეაც ტურიზმის ეროვნული ადმინისტრაციის ახალი ხელმძღვანელს გიორგი სიგუას ეკუთვნის.
აღნიშნული სამსახურის შექმნა გიორგი სიგუას სამოქმედო გეგმის ნაწილია. თავის მხრივ, ხარისხის უზრუნველყოფის სამსახურის მთავარი ფუნქციაც ქვეყნის მასშტაბით ტურისტულ ობიექტებში მომსახურების სფეროს გაუმჯობესება იქნება.
აღნიშნული ინიციატივის ფარგლებში, საქართველოს ტურიზმის ეროვნული ადმინისტრაციის ორგანიზებით, გაიმართა შეხვედრა, რომელსაც საქართველოს წამყვანი სასტუმროებისა და სარესტორნო ქსელის გენერალური დირექტორები, ასევე დონორი ორგანიზაციების წარმომადგენლები ესწრებოდნენ. შეხვედრის მთავარი თემა ტურიზმის სფეროში მომსახურების ხარისხის გაუმჯობესება და ამ მიმართულებით საქართველოს ტურიზმის ეროვნული ადმინისტრაციის მიერ განსაზღვრული სამოქმედო გეგმის პრეზენტაცია იყო.
ტურიზმის ეროვნული ადმინისტრაციის მხრიდან გამოითქვა მოსაზრება ხარისხის ნიშნის მქონე ორგანიზაციების ბაზის შექმნასა და კერძო და საზოგადოებრივი სექტორის ჩართულობაზე, ასევე საუბარი შეეხო შეფასებითი სისტემის პროექტის სტადიებს.
როგორც ტურიზმის ეროვნულ ადმინისტრაციაში განმარტავენ, შეხვედრისას ყველა მონაწილემ ქვეყანაში არადამაკმაყოფილებელი სერვისის დონეზე გაამახვილა ყურადღება, რაც მნიშვნელოვნად ტურიზმის განვითარებას აფერხებს. როგორც ტურიზმის ეროვნულ ადმინისტრაციაში აცხადებენ, ამ მიმართულებით კი საჭიროა ტურიზმის მესვეურებმა გადადგან ნაბიჯები, რომელიც გამოიწვევს სამომხმარებლო, სასტუმრო და სარესტორნო სერვისის ხარისხის ამაღლებას.
შეხვედრისას, სასტუმრო „ჰოლიდეი ინნ"-ის აღმასრულებელმა მენეჯერმა ვარელი ჩეხელიამ კვალიფიციური კადრების დეფიციტზე გაამახვილა ყურადღება და აღნიშნა, რომ რეალურად შესაბამისად მომზადებული კადრები არ არის და სასტუმროებს თავად უწევთ კადრების ხანგრძლივი გადამზადება. მისივე განმარტებით, ყაზბეგის სასტუმროში მიმტანად დასაქმების არც ერთი ადგილობრივი მსურველი არ აღმოჩნდა და კომპანიამ სამუშაო კონტინგენტი თბილისიდან აიყვანა
„საჭიროა, რომ ამ სახის დასაქმების პოპულარიზაცია მთელს ქვეყანაში მოხდეს"- აღნიშნა ვალერი ჩეხელიამ.
თავის მხრივ კი სასტუმრო „რადისონის" გენერალური მენეჯერი ამ პრობლემის მოგვარებას მხოლოდ გრძელვადიანი სახელმწიფო სტრატეგიის არსებობაში ხედავს.
„კარგი იქნებოდა, რომ შეიქმნას 10-15 წლიანი სტრატეგია ქვეყანაში ხარისხის დონის განვითარების კუთხით, ვინაიდან პერიოდების მიხედვით გაიწერება განვითარება, რომლის საბოლოო შედეგი ევროპული მომსახურების დონის მიღწევა იქნება"- განაცხადა მაიკლ ჯაკობმა.
აღსანიშნავია, რომ შეხვედრაზე განიხილეს მთავრობის ინიციატივაც, სადაც მთავრობა აპირებს 100% პროფესიული განათლების დაფინანსებას, მათ შორის სასტუმრო და სხვა სამომსახურეო ბიზნესის სპეციალისტთათვის;
ტურიზმის ეროვნული ადმინისტრაციის ხელმძღვანელის გიორგი სიგუას განმარტებით, კარგი იქნება თუ მომსახურე სფეროში მომუშავე ადამიანების პროფესიის პოპულარიზაციის მიზნით გაკეთდება გადაცემათა ციკლი სახელმწიფო მოხელეთა, თანამდებობის პირთა და სხვა საზოგადოებისთვის ცნობადი სახეების მონაწილეობით, სადაც იმპროვიზირებულ სიუჟეტებში მომსახურების ობიექტებზე ისინი მიმტანების ან სხვა ამპლუაში მოგვევლინებიან.
„ჩვენ უნდა ვიზრუნოთ თანამდებობის გაპრესტიჟულობისთვის და ზოგადად მენტალიტეტზე ზეგავლენისთვის რომ შრომა სირცხვილი არ არის"-, განაცხადა გიორგი სიგუამ.
ტურიზმის ადმინისტრაციის ხელმძღვანელმა გამოითქვა მოსაზრება ტურიზმის სფეროში ინტერნეტ მაღაზიის მსგავსი გვერდის შექმნისა, სადაც ტურისტს შეეძლება შეარჩიოს შეთავაზებები სხვადასხვა ტურისტული ორგანიზაციებიდან და სასტუმროებიდან მომსახურების შესახებ, ასევე ხარისხის კონტროლის ერთ-ერთ მექანიზმი ფარული სტუმრის სტატუსი იქნება.
ტურიზმის ეროვნული ადმინისტრაციის აღნიშნულ ინიციატივას მიესალმება ტურიზმის ინდუსტრიაში ჩართული კერძო სექტორი და მზადყოფნას გამოთქვამს თავიანთ აქტიურ ჩართულობაზე.
მსგავს შეხვედრებს ტურიზმის ბიზნესთან და ასოციაციებთან ექნება მუდმივი ხასიათი. ადმინისტრაცია იმუშავებს შეფასების სისტემის ასამუშავებლად ქვეყანაში. მოიძიებს ყველა საშუალებებს ამ მიმართულებით განვითარებისათვის. ადმინისტრაციის სამუშაო ჯგუფი მზად არის იმუშაოს სტანდარტის და შეფასების სისტემის შექმნისა და მონიტორინგისათვის ბიზნესთან ერთად მჭიდრო კოორდინაციით.