,,ნაციონალური მოძრაობა" პრაიმერში მონაწილე კანდიდატურების ვინაობას ხვალ დაასახელებს. როგორც პარტიის ოფისში გამართულ პრესკონფერენციაზე ,,ნაციონალური მოძრაობის" დეპუტატმა გიორგი ვაშაძემ განაცხადა პრაიმერში მონაწილე კანდიდატებს ხვალ, 12:00 საათზე დაასახელებენ.
"მიუხედავად ყველაფრისა, ჩვენ გადავწყვიტეთ, დევნისა და დაკავებების ფონზეც კი არ შევცვალოთ პრაიმერის ჩატარების გეგმა. ხელისუფლების ზრახვების განხორციელება და შესაბამისად ოპოზიციის არარსებობა, კატასტროფული იქნება ქვეყნისთვის და ჩვენ, როგორც პასუხისმგებლობის მქონე ოპოზიცია, 30 ივნისიდან, ვიწყებთ პრაიმერს ქუთაისიდან და ვერთვებით საპრეზიდენტო საარჩევნო კამპანიაში. სიტუაცია ძალიან რთულია, მაგრამ ამ რთულ სიტუაციაში ჩვენ გვაქვს ჩვენი პასუხისმგებლობა საქართველოს თითოეულ მოქალაქეს დავანახოთ, რა ხდება ქვეყანაში. ხვალ 12:00 საათზე დავასახელებთ კანდიდატურებს, რომელთა რეგისტრაციის ვადა დღეს მთავრდება", - განაცხადა ვაშაძემ.
