ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი დიდი ბრიტანეთის თავდაცვის მინისტრს საერთაშორისო უსაფრთხოების სტრატეგიის საკითხებში ენდრიუ მურისონს შეხვდა.
სახელმწიფო მინისტრმა ბრიტანულ მხარეს მადლობა გადაუხადა საქართველოს ტერიტორიული მთლიანობისა და სუვერენიტეტის ურყევი მხარდაჭერის, საქართველოს ოკუპირებული ტერიტორიების არაღიარების პოლიტიკის გატარებისა და ევროკავშირის სადამკვირვებლო მისიაში ბრიტანელი მონიტორების მონაწილეობისათვის.
მხარეებმა საქართველო-ბრიტანეთს შორის ორმხრივი და მრავალმხრივი თანამშრომლობის გაღრმავების საკითხები განიხილეს.
სახელმწიფო მინისტრმა შეხვედრაზე ხაზგასმით აღნიშნა, რომ ნატო-სა და ევროკავშირში გაწევრიანება საქართველოს ხელისუფლების მთავარ საგარეო-პოლიტიკურ პრიორიტეტად რჩება და განსაკუთრებით აღნიშნა ბრიტანეთის მხრიდან საქართველოს ევრო-ატლანტიკური მისწრაფებების მხარდაჭერის მნიშვნელობა.
შეხვედრაზე მხარეებმა რეგიონული უსაფრთხოების საკითხები განიხილეს, ასევე საერთაშორისო სამშვიდობო მისიებში საქართველოს მონაწილეობის მნიშვნელობაზე ისაუბრეს. ბრიტანულმა მხარემ მადლობა გადაუხადა საქართველოს ავღანეთის ISAF-ის მისიაში მონაწილეობისათვის და განსაკუთრებით აღნიშნა ქართული მხარის, როგორც ნატო-ს არაწევრი ყველაზე მსხვილი კონტრიბუტორი ქვეყნის წვლილი მისიაში. ენდრიუ მურისონმა ღრმა მწუხარება გამოთქვა ავღანეთში ქართველი სამხედრო მოსამსახურეების დაღუპვის გამო.
მხარეებმა განიხილეს საქართველოს ნატო-ში გაწევრიანების პერსპექტივები. ენდრიუ მურისონმა გამოთქვა სრული მზადყოფნა დიდი ბრიტანეთის საქართველოს ევროატლანტიკური მისწრაფებების მხრიდან მტკიცე მხარდაჭერის თაობაზე.
„საქართველოს ნატოში გაწევრიანებასთან დაკავშირებით გვაქვს ბრიტანეთის მთავრობის სრული მხარდაჭერა, ჩვენ ვიმსჯელეთ რეგიონული უსაფრთხოების საკითხებზე, ასევე, ვისაუბრეთ საქართველოში მიმდინარე პროცესებსა და ჩრდილოატლანტიკური საბჭოს ვიზიტის მნიშვნელობაზე."-განაცხადა შეხვედრის დასრულების შემდეგ ალექსი პეტრიაშვილმა