ისრაელის პრემიერ-მინისტრი ნეთანიაჰუ ბიძინა ივანიშვილს ვიზიტს აფასებს და აღნიშნულთნ დაკავშირებით პრემიერის პრესსამსახური განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ: პრემიერ-მინისტრმა ნეთანიაჰუმ პატივისცემა გამოხატა ორ ქვეყანასა და ერს შორის არსებული ბრწყინვალე ურთიერთობისა და საქართველოში ქართველი ებრაელების 26 საუკუნოვანი ისტორიის მიმართ. პრემიერმა ასევე აღნიშნა, რომ ქართველ ებრაელებს დიდი წვლილი მიუძღვით ორი ერის ისტორიული ურთიერთობის ჩამოყალიბების საქმეში.
შეხვედრის დროს პრემიერ-მინისტრმა ნეთანიაჰუმ და ივანიშვილმა ქვეყნებს შორის ორმხრივი დიალოგის გაძლიერების სურვილი გამოხატეს როგორც პოლიტიკურ, ასევე ეკონომიკურ და კულტურულ სფეროებში.
პრემიერ-მინისტრები შეთანხმდნენ, რომ ქვეყნებს შორის უნდა გაგრძელდეს კონსულტაციები სამინისტროების, პარლამენტისა და სხვა სახელმწიფო ინსტიტუტების დონზე, რათა დაცული იქნას საერთო ინტერესები, მათ შორის, უზრუნველყოფილ იქნას კონფლიქტების მშვიდობიანი გადაწყვეტა და რეგიონული სტაბილურობა, მასობრივი განადგურების იარაღის გავრცელების თავიდან აცილება და ტერორიზმთან ბრძოლა.
პრემიერ-მინისტრებმა ასევე გადაწყვიტეს, შეიქმნას ერთობლივი ეკონომიკური კომისია, რომელიც ორ ქვეყანას შორის ეკონომიკური ურთიერთობის განვითარებას შეუწყობს ხელს. პრემიერ-მინისტრები კომისიის თავმჯდომარეებად საგარეო საქმეთა მინისტრებს დანიშნავენ.
პრემიერ-მინისტრებმა ორ ქვეყანას შორის სოფლის მეურნეობაში არსებული თანამშომლობა და მისი განვითარების სამომავლო პერსპექტივები განიხილეს და შეთანხმდნენ, რომ ამ სფეროში შესაბამისი შეთანხმებები უნდა განახლდეს და გაღრმავდეს. პრემიერ-მინისტრებმა კმაყოფილება გამოხატეს მთავრობათაშორისი კულტურული თანამშრომლობის 2013-2015 წლის პროგრამის მიმართ.
პრემიერ-მინისტრებმა ადამიანის უფლებებისა და ფუნდამენტური თავისუფლებების რელიგიის თავისუფლების, ტოლერანტობისა და ანტისემიტიზმის წინააღმდეგ ბრძოლისადმი ერთგულებაზეც ისაუბრეს.
პრემიერ-მინისტრები სრულად ემხრობიან თანამშრომლობის გაზრდას საზოგადოებრივი უსაფრთხოების სფეროებში და სამომავლოდ კრიმინალის წინააღმდეგ ბრძოლის შესახებ შეთანხმების გაფორმებაზეც ისაუბრეს", -ნათქვამია განცხადებაში.
