დღეს იუსტიციის მინისტრის მოადგილე გოჩა ლორთქიფანიძემ მონაწილეობა მიიღო ჟენევის მოლაპარაკებების ფარგლებში გამართულ საინფორმაციო შეხვედრაში, სადაც საერთაშორისო სამართლის ექსპერტებმა და სხვა დაინტერესებულმა მხარეებმა სახელმწიფოების მიერ ძალის გამოუყენებლობის თაობაზე ცალმხრივი, იურიდიულად სავალდებულო განცხადების პოლიტიკური და სამართლებრივი ასპექტები განიხილეს.
ჟენევის მოლაპარაკებების მორიგი რაუნდი ხვალ, 26 ივნისს, გაიმართება. იუსტიციის მინისტრის მოადგილე მასში მონაწილეობის მისაღებად 24 ივნისს გაემგზავრა.
„მოველით, რომ ხვალ ამ საკითხების სრულად და პრინციპულად განხილვის საშუალება გვექნება", - განაცხადა გოჩა ლორთქიფანიძემ საინფორმაციო შეხვედრის დასრულების შემდეგ.
ჟენევის საერთაშორისო დისკუსიასა და ამავე ფორმატის ფარგლებში შექმნილ სამუშაო ჯგუფებში (სადაც მონაწილეები ინდივიდუალური სტატუსით არიან წარმოდგენილი) ნებისმიერი საკითხის, ინიციატივისა თუ წინადადების შეფასება პოლიტიკური, საერთაშორისო-სამართლებრივი და ადამიანის უფლებების თვალსაზრისით, სწორედ საქართველოს იუსტიციის სამინისტროს პრეროგატივაა. მათ შორისაა რუსეთის მიერ მავთულხლართებისა და ტრანშეების აგება კონფლიქტურ რეგიონებთან ადმინისტრაციულ საზღვარზე და რუსეთის მიერ ძალის გამოუყენებლობის საკითხი, რომელსაც ქართული მხარე, საგარეო საქმეთა სამინისტროს განცხადებით, მოლაპარაკებების 24-ე რაუნდზე კვლავ დააყენებს.
დღესვე იუსტიციის მინისტრის მოადგილე გოჩა ლორთქიფანიძე ორმხრივ შეხვედრებში მიიღებს მონაწილეობას.
საქართველოს იუსტიციის სამინისტრო აღნიშნულ პროცესში მოლაპარაკებების ამ ფორმატის შექმნის პირველივე დღიდან მონაწილეობს.
