დღეს, 25 ივნისს, უკრაინის ვიცე-პრემიერი ალექსანდრ ვილკული საქართველოს ეწვევა. უკრაინული მედიის ინფორმაციით, თბილისში ვიზიტისას ვილკული შეხვედრებს გამართავს საქართველოს ვიცე-პრემიერთან კახი კალაძესთან. იმავდროულად დაგეგმილია ვილკულისა და საქართველოს პრეზიდენტის მიხეილ სააკაშვილის შეხვედრაც. ვილკული მონაწილეობას მიიღებს ასევე ქართულ-უკრაინული მთავრობათაშორისი ეკონომიკური კომისიის სხდომაში. სხდომა 13:00 სათზე, სასტუმრო „შერატონ მეტეხი პალასში" გაიმართება, სადაც მხარეები ენერგეტიკულ, სოფლის მეურნეობის, ინფრასტრუქტურულ, სატრანსპორტო და განათლების სფეროებში თანამშრომლობის პერსპექტივებს განიხილავენ. ასევე იგეგმება ურთიერთთანამშრომლობის რამდენიმე დოკუმენტის გაფორმება.
უკრაინის სამთავრობო დელეგაცია ვიცე-პრემიერის ალექსანდრ ვილკულის ხელმძღვანელობით თბილისში, ორდღიანი სამუშაო ვიზიტით 24 ივნისს ჩამოვიდა. დელეგაციაში სხვა ოფიციალურ პირებთან ერთად, უკრაინის ენერგეტიკის, ეკონომიკის, სოფლის მეურნეობის, ინფრასტრუქტურის, განათლებისა და საგარეო საქმეთა მინისტრების მოადგილეები შედიან.