30-მა დევნილმა ოჯახმა დღეს ტყიბულში ახალმოსახლეობა იზეიმა. დევნილებს ბინის გასაღები ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ გადასცა. როგორც დევნილები აცხადებენ, გახარებულები არიან, რომ 20 წლის შემდეგ საკუთარ ჭერს ეღირსნენ.
ახალგარემონტებული ბინები სამინისტროსა და დონორების მიერ შემუშავებული „დევნილთა განსახლების კრიტერიუმები"-ს მიხედვით განაწილდა. დევნილებმა შეავსეს სპეციალური ანკეტები, რომელსაც მიენიჭა სათანადო ქულები. აღნიშნული ოჯახები წლების განმავლობაში საკმაოდ მძიმე პირობებში ცხოვრობდნენ.
როგორც მინისტრმა დავით დარახველიძემ აღნიშნა, დევნილთა განსახლების პროცესი გაგრძელდება: „სასიამოვნო მისია შევასრულეთ დღეს ტყიბულში, 30 ოჯახს გადაეცა საცხოვრებელი ფართი. ეს ის ოჯახებია, რომლებიც 20 წლის მანძილზე ცხოვრობდნენ დაქირავებულ ბინებში ან ნათესავებთან. ესენი არიან აფხაზეთიდან დევნილები, შენობის მდგომარეობა დამაკმაყოფილებელია, დევნილები კმაყოფილნი არიან მიღებული ფართით. ეს ფართი მათ უახლოეს მომავალში გადაეცემათ საკუთრებაში და უფლება ექნებათ, როგორც უნდათ განკარგონ. ამ ორ დღეში, ჩვენ იმერეთში 109 ოჯახი გავაბედნიერეთ და მივეცით საცხოვრებელი ფართი. მინდა, მადლიერების სიტყვებით მოვიხსენიო ყველა, ვინც მონაწილეობა მიიღო ამ კეთილშობიურ საქმეში, მათ შორის მშენებლები, დევნილთა სამინისტროს იმერეთის სამმართველოს ხელმძღვანელობა, ტყიბულის ადგილობრივი მმართველობის ხელმძღვანელობა და დევნილებს მინდა მადლობა გადავუხადო მოთმინებისთვის."
აფხაზეთიდან დევნილის - დალი იმედაძის თქმით: „1992 წლიდან დღემდე საშინელ პირობებში ვცხოვრობდი. ბინის გარეშე ვიმყოფებოდი მთელი 22 წელი. დღეს დღეობით ძალიან ბედნიერი ვარ, რომ მივიღე ჩემი კუთვნილი ბინა. კმაყოფილი ვარ ყველაფრით."
დევნილთა გრძელვადიანი განსახლების კრიტერიუმების შესაბამისად, დევნილი მოსახლეობის საცხოვრებლი ბინით უზრუნველყოფა გაგრძელდება.