73-მა დევნილმა ოჯახმა დღეს ახალმოსახლეობა აღნიშნა. მათ ახალგარემონტებული ბინის გასაღები თავად დევნილთა, განსახლებისა და ლტოლვილთა მინისტრმა დავით დარახველიძემ გადასცა და ახალმოსახლეობაც მიულოცა.
დევნილებმა ბინა სამინისტროს მიერ შემუშავებული დევნილთა განსახლების კრიტერიუმების შესაბამისად მიიღეს. მათ შეავსეს სპეციალური ანკეტები, რომელსაც შემდგომ მიენიჭა სათანადო ქულები და ყველაზე მძიმე მდგომარეობაში მყოფი 73 ოჯახი საცხოვრებელი ბინით დაკმაყოფილდა. სულ სამინისტროში შესული იყო 146 განაცხადი, თუმცა, აქედან ყველაზე მაღალი ქულა არსებული პირობებიდან გამომდინარე 73-მა ოჯახმა მიიღო. აღნიშნული ოჯახები საკმაოდ მძიმე პირობებში - ქირით, ნათესავეთან ან ვაგონებში ცხოვრობდნენ.
ეს გახლავთ პირველი საპილოტე პროექტი, როცა დევნილებმა საცხოვრებელი ბინები ახლადშემუშავებული კრიტერიუმების შესაბამისად მიიღეს. ბინების გადაცემის შემდეგი ეტაპი რამდენიმე დღეში ტყიბულში იგეგმება. როგორც სამინისტროში აცხადებენ, დევნილთა განსახლების პროცესი გაგრძელდება.
