2013 წლის 21 მაისს, თბილისში, სს პროკრედიტ ბანკმა და Oesterreichische Entwicklungsbank -მა (ავსტრიის განვითარების ბანკი) ხელი მოაწერეს საკრედიტო ხაზის პირველ ხელშეკრულებას, რომლის მიხედვითაც საქართველოში ენერგოეფექტური პროექტებისა და მცირე და საშუალო საწარმოების დაფინანსება მოხდება.
პროკრედიტ ბანკი და ავსტრიის განვითარების ბანკი 2008 წლიდან აქტიურად თანამშრომლობენ. ახალი ხელშეკრულების მიხედვით, საკრედიტო ხაზის მთლიანი თანხა 15 მილიონ დოლარს შეადგენს. თანხის 50% მიმართული იქნება ენერგოეფექტური პროექტების მხარდასაჭერად, ხოლო დანარჩენი 50% საქართველოში მცირე და საშუალო საწარმოების დაფინანსებას მოხმარდება.
პროკრედიტ ბანკის მიდგომა ენერგოეფექტური და განახლებადი ენერგიის წყაროების დაფინანსებასთან დაკავშირებით ნათლად ასახავს პროკრედიტ ჯგუფის გარემოს დაცვისადმი არსებულ პასუხისმგებლობას. შესაბამისად, 2012 წელს ბანკში გაუმჯობესდა გარემოზე ზემოქმედების რისკების შეფასება და გარემოსდაცვითი შიდა მენეჯმენტი. Aსევე, ფიზიკური და იურიდიული პირებისთვის დაინერგა "ეკო სესხი", რომელიც განკუთვნილია ენერგოეფექტური, განახლებადი ენერგიისა და გარემოსთვის უსაფრთხო ინვესტიციების დასაფინანსებლად.
ახალი ეკო სესხი, რომელიც პროკრედიტ ბანკში შეღავათიანი პირობებით გაიცემა, მსესხებლებს საშუალებას აძლევს შეამცირონ ენერგიის მოხმარება და მეტი პასუხისმგებლობით გამოიყენონ ბუნებრივი რესურსები. ბიზნეს კლიენტებისთვის ეს ნიშნავს ეფექტურ წარმოებასა და გაუმჯობესებულ კონკურენტუნარიანობას, ხოლო ფიზიკური პირებისთვის საცხოვრებელი პირობების გაუმჯობესებას.
