კომპანია „ჰიპი"-სთან თანამშრომლობის შედეგად, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ გერმანიიდან დევნილებისთვის პირველი დახმარება მიიღო. სამედიცინო აპარატურა, საოჯახო ინვენტარი, საყოფაცხოვრებო ნივთები და სხვა 20 დასახელების ინვენტარი დღეს ფოთში ჩამოიტვირთა. ტვირთი მინისტრმა დავით დარახველიძემ დაათვალიერა და აღნიშნა, რომ დევნილთა დასახმარებლად გერმანელ ბიზნესმენთან თანამშრომლობა გაგრძელდება.
დავით დარახველიძემ კლაუს ჰიპს აპრილის თვეში სამინისტროში უმასპინძლა, დევნილთა დღევანდელი მდგომარეობა გააცნო და მოკლედ ისაუბრა მათ ძირითად საჭიროებებზე. გერმანელ ბიზნესმენი დევნილი მოსახლეობის მდგომარეობით დაინტერესდა და მათ დასახმარებლად სამინისტროსთან თანამშრომლობის სურვილი გამოთქვა. შეთანხმების მიხედვით, გერმანელმა ბიზნესმენმა დევნილების დასახლმარებლად პირველი ნაბიჯი უკვე გადადგა.
როგოც მინისტრმა დავით დარახველიძემ აღნიშნა, სამედიცინო აპარატურა ბათუმის რესპუბლიკურ კლინიკურ საავადმყოფოს გადაეცემა, ხოლო დანარჩენ ინვენტარს (ინვალიდის ეტლებს და სხვა ნივთები) სამეგრელოსა და იმერეთში შეზღუდული შესაძლებლობის მქონე პირები მიიღებენ .
დავით დარახველიძე: „ დღეს ჩვენ მივიღეთ პირველი ჰუმანიტარული ტვირთი, საკმაოდ ძვირადღირებული. აქ არის სამედიცინო აპარატურა, ელექტრო საწოლები, ასევე რეგულირებადი მექანიკური საწოლები, ინვალიდთა ეტლები შეზღუდული შესაძლებლობის პირებისათვის, ასევე, საყოფაცხოვრებო ინვენტარი. სამედიცინო აპარატურას და ინვენტარს გადავცემთ ჯანდაცვის სისტემას, ხოლო დანარჩენს გადავცემთ დევნილებს. სპეციალური ეტლები განსაზღვრულია რვა ოჯახისათვის. ეს არის დახმარების პირველი პარტია და ტვირთს კიდევ ველოდებით."