აშშ-ის პირველი ლედი მელანია ტრამპი რუსეთისა და უკრაინის წარმომადგენლების შეხვედრას ხუთშაბათს უმასპინძლებს. ინფორმაციას Sky News თეთრ სახლზე დაყრდნობით ავრცელებს.
„პირველი ლედი მელანია ტრამპი თეთრ სახლში პირადად შეკრებს რუსეთისა და უკრაინის, აქტიურ ომში მყოფი ორი ქვეყნის წარმომადგენლებს. ეს მოვლენა ამერიკის ისტორიაში განსაკუთრებულ მომენტს წარმოადგენს“, — წერია თეთრი სახლის განცხადებაში.
ოფიციალურ განცხადებაში ასევე აღნიშნულია, რომ ხუთშაბათს, ადგილობრივი დროით 11:00 საათზე მელანია ტრამპი ოლეშკიში ცეცხლის შეწყვეტის შესახებ განცხადებას გააკეთებს.
თეთრი სახლის განცხადებაში არ არის დაკონკრეტებული, ვინ იქნებიან რუსეთისა და უკრაინის წარმომადგენლები, რა საკითხებს განიხილავენ შეხვედრაზე და რა ფორმატში წარიმართება საუბარი.
შეგახსენებთ, რომ ოქტომბერში მელანია ტრამპის შუამავლობით უკრაინის ხერსონის ოლქის ოკუპირებულ ქალაქ ოლეშკიში დროებითი ცეცხლის შეწყვეტის შეთანხმება ამოქმედდა. შეთანხმების მიზანი ქალაქში ჰუმანიტარული დახმარების შეტანა და მშვიდობიანი მოსახლეობის ევაკუაციის ხელშეწყობა იყო.
თეთრი სახლის ინფორმაციით, მელანია ტრამპი ამ პროცესში უშუალოდ მონაწილეობდა და რუსეთისა და უკრაინის ხელმძღვანელობასთან შეთანხმების პირობებზე მუშაობდა.
