ევროზონის ქვეყნების ფინანსთა მინისტრები ბრუსელში მიმდინარე შეხვედრაზე შეთანხმდნენ, რომ კვიპროსს ფინანსურ დახმარებას აღმოუჩენენ. ამის შესახებ ინფორმაციას ბი-ბი-სი ავრცელებს. ეკონომიკის გადასარჩენად კვიპროსი პირველი ტრანშის სახით 3 მილიარდ ევროს მიიღებს.
ბრუსელში გამართულ შეხვედრაზე მინისტრები, ასევე, საბერძნეთის შემდეგი საკრედიტო ტრანშის გამოყოფაზე შეთანხმდნენ. ამასთან, ოფიციალური ათენი ვალდებული იქნება უკვე მომავალ თვეს მოახდინოს საგრძნობი პროგრესის დემონსტრირება საგადასახადო სისტემისა და სხვა საკითხების კუთხით.
მინისტრებმა სლოვენიის საკითხიც განიხილეს, რომელიც შესაძლოა გახდეს ევროზონის მორიგი ქვეყანა, რომელიც ეკონომიკური კრიზისის გადასაჭრელად ევროკავშირს ფინანსური დახმარებისთვის მიმართავს. თუმცა, ჯერჯერობით, სლოვენიის ხელისუფლება აპირებს მოქმედებაში მოიყვანოს საკუთარი გეგმა, რომლის მიხედვითაც ქვეყანა ფინანსურ სირთულეებს საგარეო ვალის აღების გარეშე მოაგვარებს.
