11 მაისს, თბილისის ეთნოგრაფიულ მუზეუმში, "ღვინის კლუბის" ორგანიზებითა და "ღვინის ეროვნული სააგენტოს" პატრონაჟით, რიგით მეოთხე "ახალი ღვინის ფესტივალი" გაიმართება. ღონისძიებაზე წარმოდგენილი იქნება როგორც მსხვილი ღვინის კომპანიები, ასევე მცირე და ოჯახური მარნები, რომლებიც წარმოადგენენ თავიანთი ბოლო მოსავლის ღვინოს. ფესტივალს გახსნის "ღვინის ეროვნული სააგენტოს" თავმჯდომარე ლევან დავითაშვილი.
როგორც ღვინის ეროვნულ სააგენტოში განმარტავენ, წელს ამ ღონისძიებაში ოცდაათამდე კომპანია და კიდევ უფრო მეტი ოჯახური მარანი მიიღებს მონაწილეობას, რაც რეკორდული მაჩვენებელია. ის ასევე ბევრ სტუმარსაც ელის, მათ შორის - უცხოელ ტურისტებს, რომელთა დიდი ნაწილი უკვე სპეციალურად მასზე დასასწრებად ჩამოდის საქართველოში.
„აქ ღვინოები საქართველოს თითქმის ყველა ტრადიციული მევენახეობა-მეღვინეობის რეგიონიდან არის წარმოდგენილი, იხილავთ ვაზის იშვიათი ქართული ჯიშების ყურძნისაგან დაყენებულ ღვინოებსაც.
„ახალი ღვინის ფესტივალი" დღის 11 საათიდან ელის ყველა მსურველს, რომელსაც შეუძლია გაეცნოს და დააგემოვნოს საუკეთესო ახალი ღვინოები"- განმარტავენ სააგენტოში.