დღეს, 10 მაისს აჭარის მთავრობის თავმჯდომარემ ტურიზმისა და სასტუმრო აღჭურვილობის მე-6 საერთაშორისო გამოფენა „EXPO BATUMI 2013" გახსნა. გამოფენაში მონაწილეობენ როგორც ადგილობრივი, ისე უცხოური კომპანიები, სასტუმრო ქსელების, სასტუმრო აღჭურვილობის, დეკორაციების, რესტორნების და ტურიზმის სფეროში დასაქმებული სხვადასხვა კომპანიის წარმომადგენლები. გამოფენაზე წარმოდგენილია საქართველო, თურქეთი, ირანი, სომხეთი, უკრაინა, პოლონეთი, ესპანეთი და ჩინეთი.
გამოფენაზე გაიმართა სარეკლამო, საინფორმაციო ტურები, პრეზენტაციები მონაწილეთათვის და შეხვედრები მასმედიის წარმომადგენლებთან.
არჩილ ხაბაძის განცხადებით, „ეს გამოფენა მნიშვნელოვანია იმდენად, რამდენადაც ის ტურისტულ სეზონს დაემთხვა. მასში 8 ქვეყანა მონაწილეობს. გვესტუმრნენ ტრაბზონის, რიზესა და ართვინის გუბერნატორები. ღონისძიება ხელს შეუწყობს ტურიზმის განვითარებასა და მონაწილე ქვეყნებს შორის უფრო მჭიდრო კავშირების გაღრმავებას."
გამოფენის ორგანიზატორები არიან შპს „GEONET EXPO", აჭარის მთავრობა, ბათუმის მერია, აჭარის ტურიზმისა და კურორტების დეპარტამენტი და ბათუმის ტურისტული სააგენტო.