ბიზნესომბუდსმენის ინსტიტუტი წინა ხელისუფლების პირობებში უკანონოდ ჩამორთმეულ ქონებაზე მონიტორინგს ვერ გასწევს. როგორც დღეს რადიო „კომერსანტის" პრესკლუბში სტუმრობისას ბიზნესომბუდსმენმა გიორგი გახარიამ განაცხადა, მათ ამ მიმართულებით რაიმე ზეგავლენის მოხდენა არ შეუძლიათ, რადგანაც იურიდიული პროცესები ამ საქმეებზე უკვე დასრულებულია და ბიზნესუმბუდსმენს ზედმეტად ჩარევის იურიდიული ბერკეტი არ გააჩნია.
„ძირითადად ასეთ საქმეებში ფორმალური იურიდიული საქმე არის დასრულებული და ჩვენ არანაირი მექანიზმი და არანაირი ბერკეტი ამ იურიდიულად დასრულებულ საქმეებზე ზეგავლენა მოვახდინოთ არ გაგვაჩნია. ერთადერთი რაც შეგვიძლია არის, რომ მათ კონსულტაცია გავუწიოთ და მივანიშნოთ თუ რა მიმართულებით და რა გზით უფრო იქნება ეფექტური ამ პრობლემის გადაწყვეტა"- აცხადებს გახარია.
მისივე განმარტებით, უკანონოდ ჩამორთმეული ქონებების ნუსხა საკმაოდ დიდია, თუმცა თუ ბიზნესომბუდსმენის ინსტიტუტი ამ მიმართულებით კონსულტაციის დონეზე მაინც მუშაობას პრიორიტეტად გაიხდის, მაშინ მიმდინარე პრობლემების გადაწყვეტას ვეღარ მოახდენს.
„ასეთი საქმეები ბევრია და ეს ჩვენთვის არის მაღალი რისკი. მთავარმა პროკურატურამ განაცხადა, რომ ქონების სტატუსის საეჭვოდ შეცვლის 9 ათასზე მეტი ფაქტია დაფიქსირებული. ჩვენი რისკი კი მდგომარეობს იმაში, რომ ჩვენ თუ ამ საქმეებში ჩავერთვებით კონსულტაცის დონეზე, რადგანაც იურიდიული მექანიზმები არ გაგვაჩნია, ეს ჩვენთვის ქმნის რისკს იმისას, რომ უფრო მეტ დროს დავუთმობთ იმ საქმეებს, რომელიც მოდიან წარსულიდან. ამ დროს კი შესაძლოა მიმდინარე საქმეებზე კონტროლი „გაგვექცეს"- აცხადებს გახარია.
