სოციალური ვალდებულებებით დახუნძლული ბიუჯეტი წლის ბოლოსთვის გარკვეულ პრობლემებს შექმნის, - ამის შესახებ განცხადებას სააგენტო "ჯი-ეიჩ-ენთან" საუბრისას ეკონომიკური პოლიტიკის კვლევის ცენტრის აღმასრულებელი დირექტორი ნინო ევგენიძე აკეთებს. ევგენიძის განმარტებით, სებ-ი საკმაოდ კარგად მუშაობს იმისთვის, რომ შეძლოს ინფლაციის კონტროლი, თუმც პრობლემები წლის ბოლოს მაინც მოსალოდნელია.
"სებ-ი საკმაოდ კარგად მუშაობს იმისთვის, რომ შეძლოს ამის კონტროლი. ვფიქრობ, რომ სოციალური ვალდებულებებით დახუნძლული ბიუჯეტი წლის ბოლოსთვის გარკვეულ პრობლემებს შექმნის. თუმცა თავისთავად ის ფაქტი, რომ გასულ წელს ფულადი გზავნილების რაოდენობა რეკორდულად იყო გაზრდილი და როგორც ვნახეთ ეს თანხები მიემართებოდა ძირითადად ვაჭრობის სფეროსკენ. ყველაფერი კიდევ ერთხელ მიუთითებს იმას, რომ სოციალური მდგომარეობა ქვეყანაში მართლაც მძიმეა. ეს გაზრდილი ფულადი გზავნილებიც მეტყველებს იმაზე, რომ ეს პერიოდი გარკვეული პრობლემებით გამოირჩეოდა"- აცხადებს ნინო ევგენიძე.
შეგახსენებთ, რომ ბოლო პერიოდში საქართველოში დეფლაცია ფიქსირდება და როგორც ექსპერტები განმარტავენ, საქართველოს დეფლაციის მრუდში იმყოფება და ხელისუფლების მხრიდან ყველაფერი უნდა გაკეთდეს იმისათვის, რომ სიტუაცია დასტაბილურდეს. აღსანიშნავია, რომ როგორც ეკონომიკური პოლიტიკის კვლევის ცენტრის მიერ მომზადებულ კვლევაშია აღნიშნული და რომლის პრეზენტაციაც დღეს მოხდა, 2011 წელს დაფიქსირებული პიკის შემდეგ, 2012 წელს საქართველოში ინფლაცია შემცირდა და მიზნობრივ 6 %-ს არ ასცილებია. წლიური ინფლაციის განაკვეთი, მხოლოდ 0,6 % იყო. სებ-ი ეკონომიკის სტიმულირებას რეფინანსირების განაკვეთის კლებით ცდილობს, რომელიც 2013 წლის თებერვალში 4,75 %-მდე შემცირდა.
