2013 წლის აპრილში წინა თვესთან შედარებით საქართველოში ინფლაციის დონემ 0,4 პროცენტი შეადგინა. "საქსტატის" ინფორმაციით, მოცემულ პერიოდში ინფლაციის მაჩვენებლის ფორმირებაში ძირითადი გავლენა იქონია ფასების ცვლილებამ შემდეგ ჯგუფებზე: საცხოვრებელი, წყალი, ელექტროენერგია, აირი; სურსათი და უალკოჰოლო სასმელები და ასევე ტრანსპორტის ჯგუფმა.
საცხოვრებელი, წყალი, ელექტროენერგია, აირი: მოცემულ ჯგუფში ფასები გაიზარდა 9,2 პროცენტით. შესაბამისად, ჯგუფის წვლილმა აპრილის ინფლაციის მთლიან მაჩვენებელში 0,75 პროცენტული პუნქტი შეადგინა. ფასების მატება დაფიქსირდა საცხოვრებელთან დაკავშირებული
სხვა მომსახურების ქვეჯგუფზე (31,4 პროცენტი).
სურსათი და უალკოჰოლო სასმელები: მოცემულ ჯგუფში ფასები შემცირდა 1,3 პროცენტით. შესაბამისად, ჯგუფის წვლილმა აპრილის ინფლაციაში -0,41 პროცენტული პუნქტი შეადგინა. აღნიშნულ ჯგუფში ფასები შემცირდა შემდეგ ქვეჯგუფებზე: რძე, ყველი და კვერცხი (7,8
პროცენტი), შაქარი, ჯემი და სხვა ტკბილეული (1,6 პროცენტი). ამასთან ფასები გაიზარდა ხილისა და ყურძნის ქვეჯგუფზე (4,7 პროცენტი).
ტრანსპორტი: მოცემულ ჯგუფში ფასები შემცირდა 0,6 პროცენტით. შესაბამისად, ჯგუფის წვლილმა თვის ინფლაციაში -0,07 პროცენტული პუნქტი შეადგინა. ფასების კლება დაფიქსირდა საწვავ-საპოხ მასალებზე (1,4 პროცენტი).
