სებ-ის პრეზიდენტი არ გამოვრიცხავს, რომ ბანკისა და კლიენტის ურთიერთობები საერთო სტანდარტით დარეგულირდეს, რათა მომხმარებლის შეცდომაში შეყვანა არ მოხდეს. გიორგი ქადაგიძე აცხადებს, რომ საბანკო სექტორში უნდა არსებობდეს ძალიან მკაცრი ეთიკის სტანდარტი, რომელსაც ყველა კომერციული ბანკი უნდა იცავდეს. როგორც დღეს სებ-ის პრეზიდენტმა კომერციული ბანკების ხელმძღვანელობასთან შეხვედრის დაწყებამდე განაცხადა, ბანკების მხრიდან დაუშვებელია იმ სარეკლამო კამპანიის წარმოება, რომელმაც შესაძლოა, ესა თუ ის პირი შეცდომაში შეიყვანოს.
"საბანკო სექტორი სტაბილურ განვითარებას მაღალ კონკურენტულ გარემოში განაგრძობს. სწორედ ეს გახლავთ იმის მიზეზი, რომ მთელი ამ ბოლო წლების განმავლობაში საპროცენტო განაკვეთების შემცირება სახეზეა. ამავე დროს ბაზარზე ჩნდება სულ უფრო ახალი ინოვაციური პროდუქტები. ამ პროცესში კომერციული ბანკები საკმაოდ აგრესიულ სარეკლამო კომპანიას ეწევიან, რაც თავის მხრივ მისასალმებელია. იმავდროულად, დაუშვებელია ნებისმიერი ისეთი ტიპის სარეკლამო კამპანიის წარმოება, რომელსაც შეცდომაში შეყავს მომხმარებელი, რომელმაც შეიძლება მიაწოდოს არასრული ინფორმაცია ან შეუქმნას არასწორი მოლოდინები. ზუსტად ეს გახლავთ დღევანდელი შეხვედრის მიზეზი, ჩვენ ამ პროცესს ძალიან ყურადღებით ვადევნებთ თვალყურს, არ გამოვრიცხავთ ასევე ამ მიმართულებით კანონმდებლობის გამკაცრებას. საბანკო სექტორში უნდა არსებობდეს ძალიან მკაცრი ეთიკის სტანდარტი, რომელსაც განურჩევლად დაიცავს ყველა კომერციული ბანკი. მინდა კიდევ ერთხელ ვისარგებლო შემთხვევით და მოვუწოდო ყველა მომხმარებელს, ყურადღებით წაიკითხოს ხელშეკრულება ხელმოწერამდე და პრეტენზიის არსებობის შემთხვევაში მიმართოს სებ-ის მომხმარებელთა უფლებების დაცვის განყოფილებას, სადაც ყველა პრეტენზია იქნება განხილული. დღეს ჩვენ არ გვაქვს შეხვედრა ყველა კომერციულ ბანკთან, დღეს გვაქვს შეხვედრა ბანკებთან, რომლებიც აქტიურად ეწევიან სამომხმარებლო სეგმენტის დაკრედიტებას. აქ საუბარია სამომხმარებლო სესხებზე, ანუ იმ მომხმარებელზე, რომელიც ამა თუ იმ ფორმატით არ არის გათვითცნობიერებულნი სხვადასხვა პროდუქტის თავისებურებებში", - განმარტავს გიორგი ქადაგიძე.
სებ-ის პრეზიდენტი აცხადებს, რომ კომერციული ბანკების მხრიდან დაუშვებელია ისეთი სარეკლამო კამპანიის წარმოება, რომელმაც კლიენტი შესაძლოა შეცდომაში შეიყვანოს.
ქადაგიძის განმარტებით, სებ-მა 2011 წელს შესაბამისი ნორმატიული აქტი შეიმუშავა, რითაც კომერციულ ბანკებს დაავალა გამიჯნონ და დეტალურად ჩამოაყალიბონ ის ხარჯები, რომლებიც სესხის აღებასთანაა დაკავშირებული.
"ეს უკვე არის კანონმდებლობაში. დღეს ჩვენ ვსაუბრობთ სარეკლამო კამპანიაზე და ამ მიმართულებით ძალიან რთულია დავალდებულება"- განაცხადა გიორგი ქადაგიძემ.
