ეკონომიკისა და მდგრადი განვითარების მინისტრი მიიჩნევს, რომ საქართველოს სოფლის მეურნეობას, ენერგეტიკისა და ტრანსპორტის სფეროებს ახალი ტექნოლოგიები ესაჭიროება. მინისტრის აზრით ამ მიმართულებით დახმარება კი უკრაინულ შესაბამის ბიზნესებს შეუძლიათ, რომლებიც ამჟამად საქართველოში იმყოფებიან და საქართველო-უკრაინის ბიზნესფორუმს ესწრებიან.
"უკრაინა არის ჩვენი ერთ-ერთი უმნიშვნელოვანესი სტრატეგიული პარტნიორი. ჩვენ მივესალმებით უკრაინელ ბიზნესმენებს საქართველოში. საქართველო-უკრაინის ბიზნესფორუმზე განსაკუთრებით წარმოდგენილნი არიან ახალი ტექნოლოგიებიდან ბიზნესები. ეს არის ჩვენთვის ერთ-ერთი უმნიშვნელოვანსი მიმართულება, ვინაიდან ძალიან ბევრი დარგი საჭიროებს ნოუჰაუს, ახალ ტექნოლოგიებს. განსაკუთრებით ეს შეიძლება ითქვას სოფლის მეურნეობაზე, ენერგეტიკაზე და ტრანსპორტზე"- განაცხადა ეკონომიკისა და მდგრადი განვითარების მინისტრმა გიორგი კვირიკაშვილმა.
შეგახსენებთ, რომ დღეს, 26 აპრილს საქართველო-უკრაინის ბიზნესფორუმი გაიმართა, რომელიც საქართველო-უკრაინის სავაჭრო-ეკონომიკური საბჭოს, საქართველოს ეროვნული საინვესტიციო სააგენტოს, საპარტნიორო ფონდისა და უკრაინული კომპანია „Soft Rating Consult"-ის ორგანიზებით ჩატარდა.
ღონისძიება საქართველოს პრემიერ-მინისტრმა ბიძინა ივანიშვილმა გახსნა. ფორუმში მონაწილეობდნენ ასევე ვიცე-პრემიერი, ეკონომიკისა და მდგრადი განვითარების, ფინანსთა და რეგიონალური განვითარებისა და ინფრასტრუქტურის მინისტრები. ფორუმს 50-მდე უკრაინული კომპანიის წარმომადგენელი დაესწრო