აჭარაში ტურიზმის განვითარებაში ამიერიდან აჭარის ტურიზმის მრჩეველთა რეგიონალური საბჭოც ჩაერთვება. საბჭო 14 წევრისაგან შედგება, და მისი წევრები წარმოადგენენ აჭარის ტურიზმის ინდუსტრიის კერძო და არასამთავრობო სექტორებს.
აღსანიშნავია, რომ აჭარის ტურიზმის მრჩეველთა საბჭო აჭარის ა. რ. ტურიზმისა და კურორტების დეპარტამენტის ინიციატივით შეიქმნა. ტურიზმის დეპარტამენტი აპრილის თვის განმავლობაში კონსულტაციებს გადიოდა ტურიზმის ინდუსტრიის კერძო სექტორებთან. სექტორებმა თავიანთი წარმომადგენლები აირჩიეს მრჩეველთა საბჭოში, რომლებიც მათ ინტერესებს წარმოადგენენ.
როგორც აჭარის ტურიზმის დეპარტამენტში განმარტავენ, მრჩეველთა საბჭო არის დამოუკიდებელი საკონსულტაციო ჯგუფი, რომლის მთავარი მიზანია აჭარის ტურიზმის რეგიონალური პოლიტიკის განხორციელების პროცესებში აქტიური მონაწილეობა. საბჭო განიხილავს ტურიზმის ინდუსტრიაში არსებულ პრობლემატურ საკითხებს, გაითვალისწინებს სამოქალაქო ინიციატივებს, რეკომენდაციებს და რჩევის სახით წარუდგენს ტურიზმის დეპარტამენტს, რაც ხელს შეუწყობს საჯარო და კერძო სექტორებს შორის ტურიზმის სფეროში კომუნიკაციის და ნდობის ამაღლებას.
