საქართველოს მთავრობა ჩინეთში ექსპორტის გაზრდას გეგმავს. როგორც ეკონომიკისა და მდგრადი განვითარების მინისტრმა, გიორგი კვირიკაშვილმა ჩინეთის სახალხო რესპუბლიკის საერთაშორისო ვაჭრობის ხელშეწყობის საბჭოს დელეგაციასთან შეხვედრის შემდეგ განაცხადა, საქართველოს მთავრობა გეგმავს, მნიშვნელოვნად გაზარდოს ექსპორტის მოცულობა ჩინეთში. ამ მიზნით კი, საქართველო მონაწილეობას მიიღებს ჩინეთის სახალხო რესპუბლიკაში დაგეგმილ საერთაშორისო გამოფენებში, რომელშიც ქართველი მწარმოებლები მიიღებენ მონაწილეობას. აღნიშნული გამოფენების მეშვეობით, შესაძლებელი იქნება საქართველოში წარმოებული პროდუქციის პოპულარიზება ჩინეთში.
2012 წლის ოფიციალური სტატისტიკის მიხედვით, ჩინეთი საქართველოს სიდიდით მეოთხე სავაჭრო პარტნიორია. 2012 წელს სავაჭრო ბრუნვა ორ ქვეყანას შორის 7 პროცენტით გაიზარდა. ზრდის ტენდენცია შენარჩუნდა 2013 წელსაც. მათ შორის, ექსპორტის მაჩვენებელმა მოიმატა 181.9 პროცენტით. მათ შორისაა ისეთი ტრადიციული საექსპორტო პროდუქტი, როგორიცაა ქართული ღვინო, რომლის გაყიდვებიც ჩინეთში იზრდება.
