ეკონომიკისა და მდგრადი განვითარების მინისტრი გიორგი კვირიკაშვილი რუსი ინვესტორების საქართველოს ბაზრით დაინტერესებაში სამომავლოდ საფრთხეებს ვერ ხედავს. როგორც კვირიკაშვილი განმარტავს თუკი ქვეყნის შიგნით კანონმდებლობა მოწესრიგდება და კომპანიებს საშუალება არ ექნებათ მონოპოლისტები გახდნენ საფრთხეები აღარ იარსებებს.
,,რუსი ინვესტორების მხრიდან, ინტერესი ძალიან დიდია და თუ ჩვენ ქვეყნის შიგნითY კანონმდებლობას მოვაწესრიგებთ, მაგალითად ანტიმონოპოლიურს იმისთვის, რომ არ ჰქონდეს არცერთ ბიზნესს მნიშვნელოვანი კონტროლი და მონოპოლისტური მდგომარეობა ბაზარზე, ვფიქრობთ რომ არანაირ საფრთხეს არ შეიცავს ქართულ ბაზარზე რუსული ინვესტორების შემოსვლა. რუსი ინვესტორების მხრიდან ინტერესი დიდია და ეს ინვესტიციებში გადაიზარდება თუ არა ამას ჯერჯერობით ვერ იტყვი", -განაცხადა კვირიკაშვილმა.
დღეს თბილისში ვიზიტით კომპანია „RusHydro"-ს წარმომადგენლები ჩამოვიდნენ. დელეგაციას ხელმძღვანელობს „RusHydro"-ს დირექტორთა საბჭოს თავმჯდომარის მოადგილე, გიორგი რეჟინაშვილი.
ვიზიტის ფარგლებში პირველი სამუშაო შეხვედრა საქართველოს ენერგეტიკისა და ბუნებრივი რესურსების მინისტრთან, კახა კალაძესთან იმართება. დელეგაციის წევრები ასევე შეხვდებიან საპარტნიორო ფონდის აღმასრულებელი დირექტორის მოადილესა და საქართველოს სახელმწიფო ელექტროსისტემის მმართველთა საბჭოს თავმჯდომარეს.
ვიზიტს ორგანიზებას საქართველოს ეროვნული საინვესტიციო სააგენტო და საპარტნიორო ფონდი უწევენ.
რუსული კომპანია „RusHydro" მსოფლიოში ჰიდროელექტროსადგურების მფლობელი სიდიდით მეორე კომპანიაა და მისი 60-ზე მეტი ჰიდროელექტროსადგურის ჯამური დადგმული სიმძლავრე 35 გიგავატს უტოლდება.
