პოლიტიკაში დაბრუნებული ვალერი ხაბურძანია, მისი უშიშროების მინისტრად დანიშვნის პერიოდს იხსენებს და აცხადებს, რომ იმდროინდელ უშიშროების სამინიტროს ამერიკელები მართავდნენ.
"მოსკოვსკი კომსომოლეცისთვის" მიცემულ ინტერვიუში, ხაბურძანია აცხადებს, რომ მან შეძლო პანკისში საქართველოს აშშ-სა და რუსების ინტერესების გაერთიანებინა და ხეობა როგორც ჩეჩენი, ასევე არაბი ტერორისტებისგან გაეწმინდათ.
"როდესაც მე მივედი სამინიტროში იქ ყველაფერს მართავდნენ ამერიკელები.მოქმედებდა ასეთი მითითება: ჩეჩნები - თავისუფლებისთვის მებრძოლები, არაბები - ტერორისტები. ჩემთან მაშინვე მოვიდა ამერიკელი რეზიდენტი და მითხრა: " ჩვენი ქვეყნის ინტერესები გვეუბნება: ჩეჩნებს არ შევეხეოთ, მხოლოდ არაბებს". მასთან საკმაოდ არასასიამოვნო საუბარი გაიმართა, მან აშშ-ის ელჩიც კი მომიყვანა", - აცხადებს ხაბურძანია.
ინტერვიუში უშიშროების ექს-მინისტრი აღნიშნავს, რომ მან შეძლო დაერწმუნებინა რუსეთისა და აშშ-ის მხარები, რომ საქართველოსთვის როგორც არაბები ასევე ჩეჩნები წარმოადგენდნენ საფრთხეს და ხეობა ორივე ძალისგან უნდა გაწმენდილიყო.
ხაბურძანია ამტკიცებს, რომ ბერეზიოვსკის მიერ გადაღებული ფილმი იმის თაობაზე, რომ რუსეთში სახლები პუტინმა ააფეთქა სიცრუეა და სწორედ, პანკისის ხეობას აფარებდნენ თავს ის ადამიანები, რომლებმაც აფეთქებები მოაწყვეს. იგი ასევე აღნიშნავს, რომ ხეობაში ალ-ქაიდას რამდენიმე ლიდერი იმყოფებოდა.
ხაბურძანიას თქმით, სამმხრივი თანამშრომლობის პერიოდში (საქართველო-აშშ-რუსეთი), რუსულ მხარეს არასოდეს შეუძღუდავს ურთიერთობა ამერიკელებთან, მაშინ, როდესაც ამერიკული მხრიდან გარკვეული თავშეკავებები იყო.
